2023 Success stories

 Mae Celtic English Academy, ysgol iaith Saesneg yng Nghaerdydd, wedi gwneud enw rhyngwladol iddi hi hun ers iddi ddechrau addysgu myfyrwyr rhyngwladol 20 mlynedd yn ôl. Erbyn hyn mae'r cwmni'n darparu gwasanaethau ar gyfer dros 1,300 o ddysgwyr y flwyddyn o dros 50 o wledydd gan gynnwys Saudi Arabia, yr Eidal, Sbaen a Japan.

Ers lansio Rhug Wild Beauty yn 2021, mae golygon y cwmni wedi bod ar efelychu llwyddiant ei gynhyrchion cig dramor, ac wedi bod wrthi’n ddiwyd yn datblygu strategaeth allforio gyda chymorth ymgynghorwyr Masnach Tramor Llywodraeth Cymru.

Mae RM Group, cwmni gweithgynhyrchu yn y Drenewydd, yn dylunio ac yn adeiladu peiriannau awtomatig a rhai sy’n cael eu gweithredu â llaw i brosesu a phecynnu eitemau ar gyfer diwydiannau fel bwyd a diod, adeiladu, ynni, y cyfleustodau a diwydiant yn gyffredinol.Sefydlwyd y cwmni fel busnes pecynnu bach dros 20 mlynedd yn ôl, a phorthiant anifeiliaid oedd ei ffocws ar y cychwyn.Mae'r cwmni'n allforio’i gynnyrch i dros 15 o wledydd, gan gynnwys Gwlad yr Ia, Awstralia, Seland Newydd, Irac ac UDA. Allforion sydd i gyfrif am dros 20% o’i drosiant, ac mae’r ffigur yma’n tyfu bob blwyddyn, sy’n dangos gwerth allforio i’w dwf parhaus.

Mae Frog Bikes ym Mhont-y-pŵl, cynhyrchydd blaenllaw beiciau ysgafn a fforddiadwy ar gyfer plant, wedi datblygu portffolio rhyngwladol helaeth ers ffurfio'r busnes wyth mlynedd yn ôl, gyda'i gynnyrch yn cael ei werthu mewn dros 50 o wledydd ar draws pedwar cyfandir, gan gynnwys UDA a Hong Kong. Mae'r cwmni wedi gwneud enw da i'w hun ar draws y byd am ei gynnyrch o safon uchel, sy'n cael ei ddylunio a'i adeiladu’n bwrpasol yn ei ffatri i gydweddu ag anghenion ac anatomi plant.  Ymhlith cleientiaid y cwmni yn y DU mae Dug a Duges Caergrawnt, a gwelwyd eu mab, y Tywysog Louis, yn reidio un o feiciau cydbwyso'r cwmni mewn delweddau a ryddhawyd ar ei ben-blwydd yn dair oed. 

Mae Fifth Wheel Company yn Rhuallt yn dylunio ac yn adeiladu carafanau teithio pumed olwyn moethus, sy’n cael eu galw yn ‘bentai ar olwynion’ yn aml, ac sy'n gwerthu am rhwng £90-120k yr un.  Mae'r cwmni, sydd eisoes yn allforio i dros chwe gwlad -  yr Almaen, Ffrainc, Awstria, y Swistir, Awstralia a Seland Newydd, wedi gosod ei olygon ar gynyddu ei bresenoldeb byd-eang trwy ehangu ymhellach yn Ewrop, a thargedu Canada fel marchnad newydd.

Mae gan Atlantic Service Company o Gaerffili, cwmni gweithgynhyrchu blaenllaw sy'n cynhyrchu cyfarpar i’w ddefnyddio mewn gweithfeydd prosesu bwyd a siopau cig, eisoes restr helaeth o archebion rhyngwladol, a chleientiaid mewn dros 50 o wledydd ar draws y byd. Allforion sydd i gyfrif am ryw 80% o fasnach y cwmni, ac erbyn hyn mae’r cwmni’n bwriadu hybu allforion mewn tiriogaethau newydd yn rhan o gynlluniau ehangach i dyfu’r busnes.

Yn 2018, cafodd Mangar Health o Lanandras ei gaffael gan fusnes gofal iechyd Ffrengig, Winncare Group, gweithgynhyrchwr blaenllaw gwelyau, cynnyrch gofal pwysedd, offer codi cleifion ac atebion hylendid yn Ewrop.  

Mae Hexigone Inhibitors, cwmni gweithgynhyrchu uwchdechnolegol yn ne Cymru, yn mynd i'r afael â phroblem fyd-eang â chost o sawl triliwn o bunnoedd gyda'i gynhyrchion patent. Yn dilyn darganfyddiad a wnaed ym Mhrifysgol Abertawe, dechreuodd y cwmni ar ei siwrnai allforio yn 2021.

 Mae ffocws Corgi, cwmni teuluol Cymreig sy'n enwog ar draws y byd am gynhyrchu sanau a dillad gwlân moethus, wedi bod ar allforio ers blynyddoedd maith ac mae ganddo fyddin o gefnogwyr ffyddlon ym mhedwar ban y byd.Allforion sydd i gyfrif am 60% o drosiant Corgi, ac ymhlith marchnadoedd allforio craidd y cwmni mae UDA, Japan a’r Almaen, a’r UDA yw’r mwyaf o’r rhain. Cyflwynwyd Corgi i’w bartneriaid yn Tsieina a Japan gan Llywodraeth Cymru.

Mae Halton Cymru (Flamgard Calidair), cwmni gweithgynhyrchu Cymreig y mae eu cynnyrch wedi cael ei ddefnyddio mewn prosiectau blaenllaw ym mhedwar ban y byd, yn gweld ei strategaeth allforio'n talu ar ei ganfed gyda gwerthiannau’n torri pob record.  Mae Halton Cymru bellach yn disgwyl torri ei record trosiant yn 2024, ac mae golygon y cwmni ar ddyblu hyn erbyn 2030 trwy ehangu'r sylfaen o gwsmeriaid byd-eang eto fyth.