Darparydd blaenllaw dymis a chymhorthion hyfforddi ar gyfer arbenigwyr hyfforddiant achub ar draws y byd i gyd yw Ruth Lee. Mae’r dymis, sy’n cael eu dylunio a’u cynhyrchu yng Nghorwen yn y gogledd yn cael eu defnyddio gan wasanaethau milwrol, tân ac achub, y sector gofal iechyd a phobl sy’n darparu gwasanaethau achub o ddŵr, o byllau nofio i ardaloedd lle mae llifogydd yn gyffredin.
Mae’r cwmni’n gweithio gyda chwmnïau a sefydliadau ym mhedwar ban y byd, gan gynnwys gwasanaethau milwrol UDA, gwasanaethau Amddiffyn Cartref UDA, y Cenhedloedd Unedig, Llynges Awstralia, SES Awstralia, cwmnïau ynni fel Siemens ac Orsted, a meysydd awyr fel Maes Awyr Changhi yn Singapore. Yn y DU, mae Ruth Lee yn gyflenwr pwysig i’r GIG hefyd.
Mawr ar allforion
Allforion sydd i gyfrif am tua 70% o drosiant y cwmni ac mae hi ar y trywydd iawn i dorri ei record gwerthiannau o dros £4 miliwn diolch i lwyddiant allforio diweddar ar draws Gogledd America ac Ewrop, gyda llwyddiant arbennig yn Ffrainc diolch yn rhannol i ddeddfwriaeth sy’n ymwneud â defnyddio dymis hyfforddi yn y gwasanaeth tân.
Mae’r cwmni wedi gweld bod yna botensial aruthrol yn UDA ar gyfer ei ddymis trin cleifion a bariatrig mwy o faint, a gafodd eu hail-ddylunio a’u mireinio yn ystod y pandemig ar gyfer gweithwyr meddygol proffesiynol na allai hyfforddi gan ddefnyddio pobl go iawn mwyach, ond oedd angen cwblhau eu cymwysterau proffesiynol parhaus o hyd. Er iddo gael ei ddylunio ar gyfer y GIG yn wreiddiol, mae’r cynnyrch yma’n denu sylw a diddordeb yn UDA, a hynny’n bennaf diolch i natur gyfreithgar y sector iechyd yn y wlad, lle mae trin cleifion yn faes sy’n frith o feini tramgwydd cyfreithiol a hyfforddiant dwys yn y set sgiliau yma’n ffocws cynyddol.
Gwobr Brenin Am Arloesi
Stori arall am lwyddiant dros fôr Iwerydd yw marchnad achub o’r dŵr Canada, yn benodol dymi achub o byllau’r cwmni, sydd wedi ennill Gwobr anrhydeddus y Brenin am Arloesi. Cafodd y cynnyrch, sy’n cael ei allforio i dros drideg o wledydd ym mhedwar ban y byd, ei ddatblygu’n wreiddiol ar gyfer marchnad Canada i hyfforddi cenhedlaeth newydd o achubwyr medrus, a dyna’r rhanbarth lle mae’r cwmni wedi gweld y twf mwyaf yn ddiweddar.
I arddangos ei amrywiaeth helaeth o ddymis a chymhorthion hyfforddi i gwsmeriaid ar draws y byd, mae Ruth Lee yn cynnal amserlen brysur o sioeau masnach ac arddangosfeydd byd-eang.
Yn ddiweddar, mynychodd Gynhadledd Atal Boddi'r Byd yn Perth, dan arweiniad y Ffederasiwn Achub Bywyd. Yn ddiweddarach eleni, bydd y cwmni’n mynychu sawl cynhadledd ac arddangosfa diogelwch y dŵr arall, gan gynnwys Symposiwm a Sioe Masnach Blynyddol Cymdeithas Parciau Dŵr y Byd yn Las Vegas, yn ogystal â Chynhadledd Flynyddol Cymdeithas y Gweithwyr Dyfrol a Chynhadledd Diogelwch Dŵr y Gynghrair Atal Boddi Genedlaethol yn Florida, oll gyda chymorth Llywodraeth Cymru.
Achlysur arall y mae’r cwmni wedi ei fynychu gyda chefnogaeth Llywodraeth Cymru yw Arddangosfa a Chynhadledd Rhyngwladol Medica, Fforwm Meddygaeth y Byd, a gynhelir yn flynyddol yn Dusseldorf.
Mae digwyddiadau tramor yn allweddol
“Mae digwyddiadau wedi dod yn rhan anferth o’n strategaeth allforio”, meddai Paul McDonnell, rheolwr gyfarwyddwr Ruth Lee. “Rydyn ni’n mynychu mwy o’r rhain nag erioed o’r blaen ar draws y byd, ac rydyn ni’n edrych ymlaen at godi ymwybyddiaeth am ein brand mewn marchnadoedd byd-eang.”
Mae’r cwmni wedi bod yn penodi dosbarthwyr newydd mewn tiriogaethau pwysig newydd hefyd.
“Rydyn ni wedi bod yn rhagweithiol dros ben yn y Dwyrain Canol ac Asia, ac wedi penodi dosbarthwyr newydd yn Dubai ac un arall ym Malaysia, a fydd yn gofalu am Dde-ddwyrain Asia i gyd i ni”, meddai McDonnell.
“Mae India’n farchnad darged anferth arall rydyn ni’n ei archwilio’n weithredol. Yn ddiweddar, aethon ni ar ymweliad i archwilio marchnadoedd ym Mumbai a Bangalore dan nawdd Llywodraeth Cymru, lle gwnaed datblygiadau rhagorol i sefydlu partneriaid newydd yn y farchnad, ac rydyn ni’n edrych ymlaen at gyhoeddi cytundebau newydd ar y farchnad Indiaidd yn fuan iawn.”
Er mwyn cydlynu a gyrru uchelgeisiau allforio parhaus y cwmni, penododd Ruth Lee Reolwr Allforio, y person cyntaf i gael ei benodi i’r cwmni â ffocws llwyr ar allforio. Mae’n bwriadu penodi aelod arall i’w dîm allforio sydd ar dwf hefyd, a'r person yma fydd yn bennaf gyfrifol am farchnad gogledd America, lle mae’r cwmni’n gweld y twf mwyaf.
Wrth drafod y penderfyniad i archwilio opsiynau masnachu rhyngwladol a chynnig cyngor i’r rhai sy’n ystyried llwybr allforio, ychwanegodd McDonnell:
“Mae hi’n hanfodol sefydlu perthnasau da â dosbarthwyr rhanbarthol. Nhw yw wyneb eich brand mewn gwledydd eraill, felly mae sicrhau eu bod nhw’n deall y cynnyrch i’r dim ac yn teimlo’n wirioneddol angerddol yn eu cylch yn allweddol. Mae mynychu digwyddiadau masnach rhyngwladol yn ffordd wych o feithrin perthnasau â darpar-ddosbarthwyr a chwsmeriaid fel ei gilydd, Mae Llywodraeth Cymru’n cynnal Teithiau Masnach reolaidd a heb os nac oni bai, mae hi’n werth mynd arnynt.”