Mae'r arbenigwr technoleg iechyd yng Nghymru, Concentric Health, yn chwyldroi sut mae cleifion a chlinigwyr yn gwneud penderfyniadau am driniaeth trwy fynd i'r afael ag aneffeithlonrwydd prosesau cydsynio ar bapur. Mae ei blatfform cydsyniad digidol yn symleiddio'r broses, yn lleihau risgiau cyfreithiol, ac yn grymuso gwneud penderfyniadau ar y cyd.
Gyda chymorth Rhaglen Cyflymu Twf Busnes Cymru (AGP), mae Concentric wedi mireinio ei weledigaeth, ehangu mynediad i'r farchnad, a pharatoi ar gyfer twf byd-eang.
Mae Dr Patrick Hart, Perchennog Cynnyrch Clinigol yn Concentric, yn rhannu'r ysbrydoliaeth y tu ôl i'r busnes, ei heriau, a'r rhan hanfodol y mae AGP wedi'i chwarae yn ei lwyddiant.
Dywedwch wrthym am Concentric Health.
Dechreuodd Concentric Health gyda chenhadaeth i wneud penderfyniadau gofal iechyd yn fwy gwybodus, yn fwy cydweithredol ac yn rhai sy'n canolbwyntio ar y claf. Mae prosesau traddodiadol o gydsynio ar bapur yn aneffeithlon ac yn eithrio cleifion rhag cymryd rhan ystyrlon yn eu gofal. Er mwyn mynd i'r afael â'r materion hyn, rydym wedi creu platfform digidol sy'n gwneud cydsyniad yn fwy syml ac yn rhywbeth y gellir ei integreiddio'n hawdd i lifoedd gwaith clinigol.
Mae ein system, sy'n cael ei harwain gan glinigwyr a'i hategu gan dystiolaeth, yn cynnig templedi ar gyfer dros 2,500 o driniaethau – pum gwaith y swm y mae ein cystadleuydd agosaf yn ei gynnig. Mae'r platfform yn integreiddio'n syml â chofnodion iechyd electronig, gan ganiatáu mynediad mewngofnodi sengl a chysoni dogfennau'n awtomatig.
Disgrifiodd Theresa Richardson yn Ymddiriedolaeth GIG Gofal Iechyd Coleg Imperial ei fod yn "cyfateb â datrysiadau cydsyniad digidol Apple."
Sut mae cymorth AGP a Llywodraeth Cymru wedi cyfrannu at eich twf?
Mae cefnogaeth Rhaglen Cyflymu Twf Busnes Cymru a Llywodraeth Cymru wedi bod yn hanfodol i lwyddiant Concentric. Yn ystod y cyfnod cynnar, darparodd y rhaglen fentora, gan gynnwys arweiniad ar lywio cymhlethdodau'r GIG a pharatoi ar gyfer trafodaethau gyda chleientiaid allweddol. Agorodd y cymorth hwn gyfleoedd sylweddol i ni.
Ers ei lansio yn 2020, mae'r platfform wedi'i fabwysiadu gan dros 40 o Ymddiriedolaethau GIG, gan gynnwys Gofal Iechyd Coleg Imperial ac Ysbytai Prifysgol Rhydychen, a darparwyr preifat fel Circle Health Group. Mae mwy na 750,000 o gleifion yn defnyddio Concentric bob blwyddyn i reoli eu penderfyniadau gofal iechyd.
Roedd grant gan Lywodraeth Cymru yn ystod pandemig COVID-19 wedi ein galluogi i ddatblygu swyddogaethau cydsyniad o bell, sydd bellach yn hanfodol. Wrth i ni ehangu'n rhyngwladol, mae AGP yn parhau i'n harwain tuag at ymchwil marchnad a chymorth ar gyfer mynd i mewn i farchnad Awstralasia trwy eu cydweithwyr arbenigol yn Llywodraeth Cymru. Mae hyn wedi cynnwys cyllid gan Lywodraeth Cymru i fynychu gŵyl iechyd ddigidol flaenllaw Awstralia yn 2025.
Mae AGP hefyd wedi cefnogi ein tîm arwain gyda hyfforddiant pwrpasol fel y gallwn lywio twf yn effeithiol. Mae eu mewnbwn wedi bod yn drawsnewidiol, gan ein helpu ar bob cam o'n taith.
Sut mae Concentric yn mynd i'r afael â phroblemau prosesau cydsyniad traddodiadol?
Mae cydsyniad traddodiadol ar bapur yn aneffeithlon ac yn gyfreithiol beryglus. Mae llawer o ffurflenni cydsyniad yn cael eu cwblhau ar ddiwrnod y driniaeth, gan olygu nad oes fawr ddim amser i gleifion ystyried eu hopsiynau. Mae cydsyniad digidol yn datrys hyn trwy alluogi cydymffurfiaeth â safonau cyfreithiol fel dyfarniad Montgomery, sy'n pwysleisio cyfathrebu clir a phersonol. Mae Ymddiriedolaethau GIG yn amcangyfrif gostyngiad o 50% mewn risgiau cyfreithiol gyda chydsyniad digidol.
Mae cydsyniad digidol yn gwella prosesau gwneud penderfyniadau ar y cyd. Er mai dim ond 28% o gleifion sy'n adrodd am wneud penderfyniadau safon aur ar y cyd gyda chydsyniad ar bapur, mae hyn yn codi i 72% gyda chydsyniad digidol. Mae ysbytai fel Ymddiriedolaeth GIG Gofal Iechyd Coleg Imperial hefyd yn adrodd am ostyngiad o 5-10% mewn oedi a chanslo llawdriniaethau.
Am beth ydych chi'n teimlo'n fwyaf balch yma?
Rydym yn falch o effaith Concentric. Mae dros 750,000 o gleifion yn defnyddio'r platfform yn flynyddol, gan wella canlyniadau a phrofiadau ledled y DU a thu hwnt. Mae clinigwyr hefyd wedi nodi gwelliannau sylweddol mewn llif gwaith ac ymgysylltu â chleifion.
Mae clywed adborth gan gleifion grymus a chlinigwyr sy'n gweld eu gwaith yn haws yn ein hatgoffa pam rydym yn gwneud hyn. Mae ein heffaith gadarnhaol ar y system gofal iechyd a phrofiad y claf yn ein gyrru ymlaen.
Pa gyngor fyddech chi'n ei roi i entrepreneuriaid eraill?
- Canolbwyntiwch ar ddatrys problem rydych chi'n angerddol amdani — bydd yn eich cynnal trwy heriau.
- Manteisiwch ar eich cryfderau a gweithiwch gyda thîm sy'n eu hategu.
- Blaenoriaethwch adborth defnyddwyr i fireinio'ch cynnyrch a'ch prosesau.
- Cydnabyddwch mai taith yw llwyddiant — dewch o hyd i fodlonrwydd yn y broses, nid dim ond y canlyniad.
Cliciwch yma am ragor o wybodaeth am Raglen Cyflymu Twf.
Cliciwch yma i ddysgu rhagor am Concentric Health.