Mae Llywodraeth Cymru wedi cyhoeddi cymorth ariannol pellach i fusnesau yn Sir Fynwy yr effeithiodd Storm Claudia arnynt, gyda grantiau o hyd at £3,000 bellach ar gael.
Bydd y cyllid ychwanegol yn cael ei ryddhau i Gyngor Sir Fynwy i helpu busnesau yr effeithiodd llifogydd arnynt i adfer ac ailadeiladu yn dilyn y dinistr diweddar.
Mae'r cyllid hwn yn ychwanegol at y £2.5 miliwn a mwy sydd eisoes ar gael gan Lywodraeth Cymru yn dilyn y digwyddiad mawr hwn a gafodd ei ddatgan oherwydd tywydd eithafol.
Dywedodd Rebecca Evans, Ysgrifennydd y Cabinet dros yr Economi, Ynni a Chynllunio:
Mae Storm Claudia wedi cael effaith ddinistriol ar fusnesau yn Nhrefynwy. Bydd y cyllid ychwanegol hwn yn darparu cymorth ymarferol i helpu busnesau yr effeithiodd y storm arnynt i adfer.
Rydym wedi ymrwymo i sefyll gyda chymuned fusnes Sir Fynwy yn ystod y cyfnod anodd hwn a byddwn yn parhau i weithio'n agos gyda Chyngor Sir Fynwy i sicrhau bod help yn cyrraedd y rhai sydd ei angen fwyaf.
Roedd y pecyn cymorth cychwynnol a gyhoeddwyd yr wythnos ddiwethaf yn cynnwys:
- grantiau o £500 a £1,000 fesul cartref yr effeithiodd y llifogydd arnynt
- cyllid ar gyfer costau ymateb i argyfwng, gan gynnwys gwacáu, darparu bwyd, gwaredu gwastraff a llogi offer
- cefnogaeth ar gyfer gostyngiadau treth gyngor yn ôl disgresiwn ar gyfer aelwydydd sydd wedi dioddef o lifogydd
- gostyngiadau yn ôl disgresiwn mewn ardrethi annomestig ar gyfer eiddo y mae'r llifogydd wedi effeithio arnynt
Dylai'r rhai yr effeithiwyd arnynt gysylltu â Chyngor Sir Fynwy i gael rhagor o wybodaeth.
Am ragor o wybodaeth am lifogydd a chymorth, ewch i wefan Cyngor Sir Fynwy.