Cwmni o ymgynghorwyr dylunio a chanolfan ymchwil rhyngwladol arobryn yw PDR, ac fe’i sefydlwyd yng Nghaerdydd ym 1994.
Trwy gyfuno gwaith dylunio a pheirianneg hollol fodern â gwaith ymchwil pwrpasol, mae’r cwmni’n helpu sefydliadau ym mhedwar ban y byd i ddatblygu cynnyrch, systemau a phrofiadau ar draws sawl sector, gan gynnwys gofal iechyd, trafnidiaeth a gwasanaethau cyhoeddus.
Gydag enw da am gyflawni atebion effeithiol, mae cleientiaid PDR yn cynnwys cwmnïau rhyngwladol, llywodraethau a sefydliadau academaidd. Mae enwau nodedig fel Banc Canolog Ewrop, Krupps a Tefal oll wedi elwa ar arbenigedd y cwmni.
Mae allforion wedi bod wrth galon twf y cwmni ers iddo ddechrau masnachu’n rhyngwladol yn 2017. Heddiw, allforion sydd i gyfrif am 50-60% masnach PDR, sef tua hanner twf y cwmni yn ystod y cyfnod hwn. Mae’r llwyddiant yma wedi caniatáu i PDR ennill ei blwyf fel un o gwmnïau ymgynghori mwyaf blaenllaw'r byd ym maes dylunio.
Mae marchnadoedd allweddol y cwmni’n cynnwys UDA, yr Almaen a Ffrainc, gyda phrosiectau pellach yn cael eu cyflawni ar draws Dwyrain Ewrop, y Dwyrain Canol ac Asia. Mae allforio wedi caniatáu iddo gystadlu’n uniongyrchol â rhai o gwmnïau dylunio mwyaf y byd, ac ennill contractau gyda ‘chleientiaid eu breuddwydion’ a fyddai wedi bod y tu hwnt i’w gafael wrth weithredu yn y DU yn unig.
Mae cymorth rhaglenni allforio Llywodraeth Cymru wedi bod yn hanfodol i’r llwyddiant yma. Mae teithiau masnach, ymchwil i’r farchnad a chyflwyniadau i bobl sy’n gwneud penderfyniadau ar draws y byd wedi agor drysau yn UDA ac Ewrop, tra bod mynychu arddangosfeydd rhyngwladol fel MEDICA yn rheolaidd wedi creu cyfleoedd i feithrin perthnasau hyderus â chleientiaid wyneb yn wyneb.
Ers dechrau ei siwrnai allforio, mae PDR wedi ehangu ei dîm a’i sylfaen o gwsmeriaid. Gyda’i olygon yn gadarn ar dwf parhaus, mae’r cwmni bellach yn chwilio’n ymarferol am ragor o fusnes yn Nwyrain Asia, ac wedi cwblhau darn sylweddol o waith ar gyfer sefydliad yn Ynysoedd y Philippines yn ddiweddar.
Dywedodd Jarred Evans, Cyfarwyddwr PDR Design:
“Trwy allforio, mae PDR wedi tyfu’n sylweddol am ei fod wedi ei ffeindio’i hun yn cystadlu â rhai o gwmnïau dylunio mwyaf y byd sydd ag adnoddau penigamp. Er bod gweithio yma yng Nghymru’n bwysig, mae allforio ein gwasanaethau dramor yn agor byd o gyfleoedd i ni. Mae allforio wedi bod yn hanfodol o’n twf ac wedi caniatáu i ni ehangu ein gorwelion a lledu ein cwmpas wrth aros yn gwmni Cymreig balch â’i wreiddiau’n ddwfn yn y brifddinas.
“Mae cymorth allforio Llywodraeth Cymru wedi helpu PDR Design i fod yn y lle cywir ar yr amser cywir, gan ein galluogi ni i feithrin perthnasau ar draws y byd a helpu i amddiffyn hirhoedledd y busnes trwy leihau ein dibyniaeth ar un farchnad yn unig. Heb y cymorth yma, ni fyddem yn y sefyllfa rydym ni heddiw. Ers gosod pwyslais ar allforio, rydyn ni wedi ehangu i farchnadoedd allforio newydd, wedi cynyddu ein masnach yn sylweddol, ac erbyn hyn rydyn ni’n gweithio gyda brandiau rhyngwladol o fri.”