Roedd disgwyl hir am Gyllideb Hydref 2024, a gyflwynwyd gan y Canghellor Rachel Reeves, gan fusnesau a oedd yn awyddus i ddeall sut y bydd y Llywodraeth newydd yn blaenoriaethu twf. Yn y canllaw hwn, rydym yn archwilio'r newidiadau allweddol a'u goblygiadau i gwmnïau yng Nghymru.
Paratowyd yr erthygl hon gan un o'n partneriaid prosiect arbenigol, Joel Dunning (Director - Head of GS Verde Tax & Accountants), GS Verde, sy'n rhoi mewnwelediadau arbenigol i helpu busnesau i lywio'r diweddariadau hyn. Dyma ddadansoddiad o'r newidiadau hanfodol y mae angen i chi wybod amdanynt:
Diweddariadau allweddol i fusnesau
1. Cyfraniadau Yswiriant Gwladol (NICs):
- Bydd NICs cyflogwyr yn codi 1.2%, o 13.8% i 15%, yn effeithiol o 6 Ebrill 2024 ymlaen.
- Mae'r trothwy ar gyfer busnesau llai i hawlio rhyddhad wedi ei ehangu, gyda chap newydd o £10,500.
2. Treth Gorfforaeth:
- Mae'r dreth gorfforaeth yn parhau wedi ei chapio ar 25% drwy gydol y llywodraeth bresennol.
- Mae cymhellion treth Ymchwil a Datblygu (R&D) yn aros heb eu newid, gan annog buddsoddiad arloesi.
3. Cyfraddau Busnes:
- Bydd y gostyngiad o 75% ar gyfradd busnes yn cael ei ostwng i 40% ym mis Ebrill 2025, gyda chap o £110,000.
Effaith ar unigolion
Cynnydd Isafswm Cyflog:
- fis Ebrill 2025 ymlaen, bydd yr isafswm cyflog ar gyfer y rhai sy'n 21 oed a throsodd yn codi i £12.21 yr awr, sef cynnydd o 6.7%.
Treth Enillion Cyfalaf (CGT):
- Gan ddechrau ar 30 Hydref 2024, bydd cyfraddau CGT ar werthiannau asedau yn cynyddu i 18% (cyfradd is) a 24% (cyfradd uwch).
- Bydd cyfraddau Rhyddhad Gwaredu Asedau Busnes (BADR) yn cynyddu i 14% yn 2025 a 18% yn 2026.
Treth Etifeddiant (IHT):
- Mae trothwyon IHT yn parhau wedi'u rhewi tan 2030, gyda newidiadau i Ryddhad Eiddo Busnes a Rhyddhad Eiddo Amaethyddol yn dod i rym yn 2027 ar gyfer asedau gwerth dros £1 miliwn.
Diweddariadau i Ymddiriedolaethau Perchnogaeth Gweithwyr (EOTs)
Roedd nifer o ddiweddariadau sylweddol i EOTs yn y Gyllideb hon, gan gynnwys:
- Cyfnod Cydymffurfio Estynedig: Mae amodau cymhwyso rhyddhad CGT yn berthnasol am bedair blynedd dreth ar ôl y gwerthiant, gan gyflwyno cyfnod risg hirach i werthwyr.
- Gofynion Datgelu Cynyddol: Rhaid i werthwyr nawr ddarparu data manwl yn ystod eu hawliad rhyddhad CGT, gan gynnwys nifer y gweithwyr a phrisiau prynu y cytunwyd arnynt.
- Gofyniad Preswylio yn y DU: Rhaid i ymddiriedolwyr fod yn breswylwyr y DU adeg gwerthu i fod yn gymwys i gael gostyngiad treth.
Er gwaethaf y newidiadau hyn, mae EOTs yn parhau'n opsiwn gadael effeithlon a deniadol o ran treth. Maent yn cynnig buddion megis parhad diwylliannol, ymgysylltu â gweithwyr, a bonysau blynyddol di-dreth o hyd at £3,600 i weithwyr.
Beth mae hyn yn ei olygu i berchnogion busnes
Mae busnesau'n wynebu tirwedd newidiol gyda chostau cyflogwyr uwch (trwy NICs a chynnydd mewn cyflogau) ynghyd â newidiadau i gydymffurfiad CGT ac EOT. Fodd bynnag, mae'r mesurau hyn yn darparu eglurder a sefydlogrwydd, gan gynnig sylfaen ar gyfer cynllunio strategol, buddsoddiad a thwf.
Mae EOTs yn parhau i gyflwyno manteision sylweddol i'r rhai sy'n ystyried cynllunio olyniaeth, gan alluogi perchnogion busnes i ymadael mewn modd effeithlon o ran treth wrth feithrin gweithle cydweithredol a phwrpasol.
Camau Nesaf: Cymorth ar gyfer llywio newid
Wrth i'r amgylchedd cyllidol esblygu, mae paratoi yn allweddol. Ar gyfer busnesau sydd am addasu, boed hynny drwy gyllidebau diwygiedig, strategaethau buddsoddi, neu archwilio EOTs yn strategaeth ymadael, mae Rhaglen Cyflymu Twf Busnes Cymru yma i helpu.
Siaradwch â'ch rheolwr perthnasoedd AGP i drafod sut y gallai'r newidiadau hyn effeithio ar eich busnes ac archwilio cymorth wedi'i deilwra i gyd-fynd â'ch uchelgeisiau twf.