Mae Diwrnod Shwmae Su’mae yn cael ei gynnal yn flynyddol ar 15 Hydref. Mae’n ddathliad cenedlaethol o’r Gymraeg, ble bynnag rydych chi’n byw a beth bynnag fo’ch lefel.
Cyfle i gael hwyl a rhannu’r iaith, yn y siop, y ganolfan hamdden, yn y gwaith, gyda ffrindiau. Yn y gorffennol dathlodd ysgolion, bwytai a gorsafoedd radio.
Eleni, bydd yr ymgyrch “Pwy Sy’n Dweud Shwmae?” yn annog pobl o bob oed, cefndir a chymuned i rannu fideo ohonynt eu hunain, neu rywun yn eu cymuned, gan ddangos pwy ydyn nhw, o ble maen nhw’n dod, a sut mae’r Gymraeg yn rhan o’u bywydau.
Mae syniadau eraill i ddathlu’r diwrnod ar gael ar wefan Shwmae Su’mae: Shwmae. Cymru, gyda sticeri, ffrâm hunlun a swigod ‘shwmae’ ar gael i’w lawrlwytho.
Am fwy o wybodaeth, dilynwch y ddolen hon: Beth yw Diwrnod Shwmae Sumae?
Mae cannoedd o fusnesau yn gweld buddion o ddefnyddio’r Gymraeg o ddydd i ddydd. Mae’n creu cysylltiadau cryfach â chwsmeriaid, defnyddwyr gwasanaeth, a’r gymuned, ac yn rhoi mantais gystadleuol i chi. Does dim rhaid mynd ati i wneud popeth yn Gymraeg yn syth. Mae’n hawdd cymryd camau bychain i ddatblygu yn syth. Mae Cymraeg Yn Eich Busnes | Busnes Cymru, yn dangos sut i gychwyn eich taith i ddatblygu’r Gymraeg, a’r cymorth sydd ar gael gan wahanol sefydliadau i’ch helpu.