I Elliot Riley-Walsh, casglwr brwd ers yn bump oed, roedd rheoli ei gasgliadau amrywiol yn her. Er bod llwyfannau catalogio arbenigol yn bodoli ar gyfer oriorau a gwaith celf, doedd dim llwyfan i helpu casglwyr i gatalogio casgliadau arbenigol, popeth o hen geir tegan i ddeunyddiau cofio ffilmiau, mewn un lle. Dyna sut y daeth Elliot â'r syniad ar gyfer Valart: llwyfan wedi'i bweru gan AI lle mae casglwyr ond yn lanlwytho llun ac ar unwaith caiff ei nodi, ei gatalogio a’i brisio’n gywir ar gyfer unrhyw gasgliadau.
Heddiw, mae Valart yn gwasanaethu casglwyr ar draws wyth gwlad a phedwar cyfandir, gyda dros 100 o gwsmeriaid yn defnyddio'r platfform i drefnu eu trysorau, sicrhau yswiriant, a chynllunio eu hetifeddiaeth. Mae'r cwmni'n profi y gall technoleg glyfar a'r cymorth cywir droi angerdd personol yn fusnes rhyngwladol.
Mae'r sylfaenydd a'r Prif Swyddog Gweithredol Elliot Riley-Walsh yn rhannu sut y cyflymodd Rhaglen Twf Cyflym Busnes Cymru (AGP) daith Valart o gysyniad i blatfform technoleg arobryn.
Beth a’ch ysbrydolodd chi i ddechrau Valart?
Rydw i wedi bod yn gasglwr ers pan oeddwn i'n ifanc, ac roeddwn i am gael platfform a allai fy helpu i reoli a phrisio fy nghasgliad. Mae Valart yn gwneud pethau’n syml: rydych chi'n lanlwytho llun, ac mae ein AI yn nodi'r eitem, yn ei chatalogio, ac yn darparu prisiad cywir gan ddefnyddio miloedd o ffynonellau data. Mae'n gweithio ar gyfer unrhyw beth o hen deganau a chardiau masnachu i LEGO, gwaith celf a hen bethau.
Pa broblem mae Valart yn ei datrys?
Mae gan gasglwyr eitemau amrywiol, yn aml, ar draws sawl categori a gall olrhain popeth â llaw fod yn dreth. Mae Valart yn galluogi defnyddwyr i gatalogio unrhyw eitemau casglu ar unwaith a derbyn prisiadau cywir, cyfredol o'n system, sy'n harneisio modelau iaith AI lluosog a miloedd o ffynonellau data sydd wedi'u gwirio. Rydym yn helpu casglwyr i sicrhau yswiriant priodol; mae llawer o yswirwyr yn cael trafferth prisio casgliadau yn gywir, ond gyda Valart, gallwch chi brofi beth sy’n eiddo i chi. Mae ein teclyn rheoli etifeddiaeth hefyd yn sicrhau bod casgliadau'n cael eu deall a'u gwerthfawrogi'n briodol i deuluoedd. Does dim llwyfan arall ar y farchnad sy’n cynnig yr holl swyddogaethau hyn.
Sut y’ch cynorthwyodd RCT chi wrth i chi dyfu?
Daeth y cymorth mwyaf effeithiol pan wnaethom gymryd rhan mewn Taith Allforio Llywodraeth Cymru i Japan ym mis Mehefin 2025. Trwy RCT, buom yn gweithio gydag arbenigwr yn niwylliant busnes Japan a’n helpodd ni i baratoi'n drylwyr a gwneud yn fawr o'r cyfle. Cefnogodd RCT hefyd ein hail-frandio, sydd wedi rhoi gwell lleoliad i ni yn y farchnad ac wedi ein helpu i fynegi ein cynnig gwerth yn gliriach i ddarpar gwsmeriaid a phartneriaid.
Pa gerrig milltir ydych chi’n fwyaf balch ohonyn nhw?
Adeiladu cwmni technoleg ar gyllideb fach sy'n ymgorffori AI mewn nifer o ffyrdd, ynghyd â rhagori ar 100 o gwsmeriaid ers ei lansio. Dwy flynedd a hanner yn ôl, doeddwn i ddim yn credu bod unrhyw beth o hyn yn bosib! Enillon ni brif wobr Baltic Venture Launchpad ac un o Wobrau Dechrau Busnes Cymru. Rydyn ni wedi dod yn llwyfan byd-eang go iawn gyda defnyddwyr ar draws wyth gwlad a phedwar cyfandir a hynny yn gyfan gwbl trwy argymhellion llafar a chwilio organig. Mae’r twf organig yn dilysu popeth rydyn ni’n ei adeiladu. Mae cwsmeriaid yn dweud wrthym fod Valart wedi trawsnewid sut maen nhw'n rheoli eu casgliadau, gan roi tawelwch meddwl iddyn nhw ar gyfer yswiriant a chynllunio etifeddiaeth.
Pa gyngor y byddech chi’n ei roi i entrepreneuriaid eraill?
Bydd pawb yn rhoi cyngor i chi, ond does dim angen i chi dderbyn popeth. Trionglwch y cyngor a gwrando ar eich greddf. Wrth ddod â phobl ar eich tîm, gwnewch yn siŵr bod eu gwerthoedd nhw’n cyd-fynd â’ch rhai chi. Mae angen pobl arnoch chi a fydd yn rhoi her iach i chi ac yn gwthio nôl pan fydd angen, oherwydd dyna sy’n eich helpu chi i dyfu. A chofiwch: os na ofynnwch chi, chewch chi ddim. Holwch o hyd. Does wybod ble y gallai arwain.
Beth sydd nesaf i Valart?
Dros y chwe mis nesaf, rydyn ni’n gobeithio cyflogi ein haelod amser llawn cyntaf. Rydyn ni’n ehangu ein cynnig busnes-i-fusnes, gan weithio mewn partneriaeth â rheolwyr cyfoeth, cwmnïau cyfreithiol a darparwyr yswiriant i ategu ein llwyfan defnyddwyr craidd a chreu cysylltiadau dyfnach ar draws y gadwyn werth eitemau casglu.
Dysgwch ragor am sut y gall y Rhaglen Cyflymu Twf gynorthwyo eich busnes chi.
Dysgwch ragor am Gymorth Allforio Llywodraeth Cymru.
Dysgwch ragor am Valart.