Mae tîm Hybu Comisiynydd y Gymraeg yn gweithio gyda busnesau ac elusennau o bob math, o fanciau ac archfarchnadoedd i elusennau cenedlaethol a rhyngwladol.
Mae defnyddio’r Gymraeg yn ffordd wych o gryfhau eich brand, cysylltu â chwsmeriaid, a dangos ymrwymiad i’n diwylliant.
Pam?
Un o’n prif swyddogaethau ni yn y Tîm Hybu yw cefnogi busnesau ac elusennau i ddatblygu eu darpariaeth Gymraeg. Rydym yn rhannu arferion da ac yn cynnig cefnogaeth drwy ein cynllun Cynnig Cymraeg , sy’n gynllun gweithredol sy’n gosod targedau i ehangu’r defnydd o’r Gymraeg o dan 5 thema allweddol.
Dyluniad eich Brand
- Os nad oes modd cael enw Cymraeg neu ddwyieithog ar eich busnes, beth am ystyried “Cymru” yn hytrach na “Wales”?
- Ychwanegwch slogan Cymraeg neu ddwyieithog i gryfhau hunaniaeth.
- Oes modd ystyried elfennau gweledol sy’n adlewyrchu Cymru?
Darllenwch ein Canllaw Dylunio Dwyieithog.
Cyfryngau Cymdeithasol: Allwedd i Ehangu Eich Brand
Mae presenoldeb ar y cyfryngau cymdeithasol yn hanfodol i fusnesau heddiw. Mae’n ffordd effeithiol o gyrraedd cynulleidfa newydd.
Enghraifft dda:
- Brand dillad cynaliadwy sy’n dathlu harddwch Cymru yw Pen Wiwar. Mae’r busnes wedi gwneud y Gymraeg yn rhan ganolog o’u hunaniaeth, ac mae hynny’n amlwg ar eu cyfryngau cymdeithasol.
Awgrymiadau ar gyfer cynnwys dwyieithog
- Reels (Fideos byr): Mae reels yn derbyn y lefel uchaf o ymgysylltiad ar draws platfformau fel Instagram a TikTok. Cofiwch ychwanegu teitlau dwyieithog i’ch fideos a chlawr reels. Os oes gennych deitl hir, defnyddiwch air Cymraeg ar y dechrau, e.e. “Sut – How to support our appeal?”
- Defnydd o rifau: Ar gyfer dyddiadau, defnyddiwch rifau yn hytrach na dyddiau’r wythnos i leihau testun.
- GIFs Cymraeg: Mae llawer ar gael drwy chwilio ar Instagram, gan gynnwys rhai gan gwmni Mwydro. Gallwch hefyd greu GIFs eich hun i wneud eich cynnwys yn fywiog
- Dyddiau Arbennig: Gwnewch y mwyaf o ddigwyddiadau fel Dydd Gŵyl Dewi, Diwrnod Shwmae Sumae, Ymgyrch Defnyddia Dy Gymraeg, Dydd Miwsig Cymru, Diwrnod Santes Dwynwen, a’r Eisteddfodau.
- Ailrannu cynnwys Cymraeg: Rhannwch gynnwys o gyfrifon Cymraeg tebyg i gynyddu amlygrwydd y Gymraeg ar eich sianeli.
Ewch draw i dudalennau @pen_wiwar a @mwydro am enghreifftiau.
Paratoi ymlaen llaw
Mae cyfryngau cymdeithasol yn cael eu diweddaru’n ddyddiol, felly ceisiwch baratoi cynnwys ymlaen llaw. Os oes angen cyfieithu testun, ystyriwch greu banc o destun parod i’w ddefnyddio.
Cofiwch - does dim rhaid i gapsiwn fod wedi’i gyfieithu air am air; gallwch fod yn greadigol a defnyddio idiomau neu gyfeiriadau Cymraeg.
Recriwtio Staff a Gwirfoddolwyr
Gall recriwtio staff a gwirfoddolwyr fod o gymorth mawr i’ch gweithlu wrth ddarparu gwasanaeth i’r cyhoedd.
Ystyriwch:
- Hysbysebu y swydd yn ddwyieithog.
- Nodwch y Gymraeg fel sgil dymunol neu hanfodol.
Mae’r platfformau isod yn blatfformau Cymraeg lle gallwch hyrwyddo swyddi:
- Golwg360
- Safle Swyddi
- Lleol
- Swyddle
- Penodi
Cryfhau sgiliau Cymraeg eich gweithlu
Mae’r Tîm Hybu yn gweithio mewn partneriaeth gyda’r Ganolfan Dysgu Cymraeg Cenedlaethol i gefnogi sefydliadau drwy’r cynllun Cymraeg Gwaith.
Fel rhan o’r broses o dderbyn cymeradwyaeth y Cynnig Cymraeg, byddwn yn cydweithio gyda’ch sefydliad i gynnig opsiynau i’ch staff neu wirfoddolwyr ddysgu, datblygu neu godi hyder i ddefnyddio’r Gymraeg.
Ewch draw i wefan Dysgu Cymraeg am fwy o wybodaeth.
Adnoddau i’ch helpu
Helo Blod: Gwasanaeth cyfieithu gan Lywodraeth Cymru.
Term Cymru: Cronfa dermau swyddogol.
Cysill: Offer gwirio sillafu a gramadeg.
Adnoddau Microsoft: Ar gael yn Gymraeg.