Tabitha Davies

Cyflwyniad

Yn 11 oed, fe wnaeth Tabitha fynd ati i droi’r hyn roedd hi’n mwynhau ei wneud yn fusnes. Dyma’i hanes a’r cyngor sydd ganddi i bobl ifanc eraill sydd eisiau troi eu hobi yn fusnes.

Pam wnest ti benderfynu dechrau busnes tra’n dal yn yr ysgol?

Yn 9 oed, ar ôl gweld ei ffrindiau yn gwneud breichledau, penderfynodd Tabitha ymuno â nhw. Roedd hi wrth eu bodd yn eu gwneud nhw, ac ar ei phen-blwydd, gofynnodd am fwy o leiniau ac edafedd er mwyn gallu dechrau ei busnes ei hun. Am y ddwy flynedd ddiwethaf mae hi wedi bod yn dylunio a chreu breichledau gan eu gwerthu i ffrindiau, teulu, a'r gymuned ehangach. Mae hi wedi gwerthu dros 400 o freichledau hyd yn hyn ac mae'r busnes yn gwneud elw da.

Mae Tabitha yn edrych ar Pinterest i gael ysbrydoliaeth wrth greu ei dyluniadau, ac yn eu haddasu ac yn meddwl am y ‘trends’ diweddaraf (roedd ei breichledau 'Wicked' yn boblogaidd y llynedd!) a hefyd beth sy’n gweithio'n dda. 

"Roeddwn i’n arfer cymryd mwy o amser [yn gwneud y breichledau] ond nawr dwi’n llawer cyflymach," meddai Tabitha. Mae hi bellach yn swmp-brynu cyflenwadau oherwydd bod hynny’n rhatach, ac yn ychwanegu cerdyn busnes arbennig 'handmade with love' a sticer gyda phob breichled. 

Pa gefnogaeth ges ti gan deulu neu eraill wrth ddechrau?

Cytunodd teulu Tabitha i brynu'r cyflenwad cyntaf iddi yn anrheg pen-blwydd. Ers hynny, mae'r busnes yn ariannu ei hun, ond mae ei thad wedi helpu trwy wneud byrddau arddangos er mwyn gallu dangos ei gwaith mewn ffeiriau crefftau, ac mae ei mam wedi creu ac yn goruchwylio cyfrif Instagram ar gyfer Tabitha, sy'n boblogaidd iawn.

Pan fydd hi’n mynd â’i breichledau i’r ffeiriau lleol, mae’r cwsmeriaid mor hoff o’i breichledau fel ei bod yn gwerthu’r stoc i gyd! Fel arfer dydy Ffair Haf yr ysgol ddim yn gadael i ddisgyblion gael eu stondin bersonol, ond mae hi wedi cael cynnig stondin eleni.

Pa gynlluniau sydd gen ti ar gyfer y dyfodol?

Mae Tabitha yn bwriadu parhau i wneud y breichledau, ond mae ganddi hefyd syniadau eraill fel tlysau ffôn, torchau allweddi, a mwclis. Mae'n deall bod y sgiliau y mae hi'n eu datblygu trwy redeg y busnes yn ei helpu gydag agweddau eraill ar ei bywyd, "Fe wnes i gais i fod yn Brif Ferch yn fy ysgol ac fe wnes i roi llawer o fanylion am fy musnes yn y cais. Ches i ddim fy newis yn Brif Ferch ond fe ges fy ethol yn Swyddog". Mae Mam Tabitha yn dweud ei bod hi nawr yn llawer mwy hyderus wrth siarad â chwsmeriaid, rheoli lefelau stoc a rheoli ei harian.

Pa gyngor fyddet ti'n ei roi i berson ifanc sy'n ystyried dechrau busnes tra'n dal yn yr ysgol?

Mae dod o hyd i rywbeth rwyt ti'n ei fwynhau ac yn gallu ei wneud yn dda yn allweddol i lwyddiant busnes Tabitha ac mae hi'n ddiolchgar am yr help a gafodd gan ei rhieni ar y dechrau, yn ogystal â’r gefnogaeth gan ffrindiau a'r ysgol. 

"Os ydych chi’n gallu gwneud rhywbeth yn dda, rhowch gynnig arni. Os nad yw hynny'n llwyddo, rhowch gynnig ar rywbeth arall."

"Chwiliwch am rywun sy’n gallu’ch helpu i wireddu eich breuddwydion."

Yn amlwg, mae Tabitha wrth ei bodd yn rhedeg ei busnes a meddwl am syniadau newydd. Mae hi'n berson ifanc talentog iawn ac edrychwn ymlaen at weld ei chynnyrch newydd dros y misoedd nesaf