Sophie Morgan

Dychwelodd Sophie Morgan i Gymru pan gafodd drafferth dod o hyd i waith ar ôl graddio. Cymerodd reolaeth dros ei bywyd gan ddechrau ei busnes ei hun yn trin ewinedd o’i chartref ym Mhen-bre, sef Peaceful Polish. 

Sylwodd Sophie, a berffeithiodd ei thechnegau trin ewinedd yn ystod y cyfnod clo, fod yna fwlch yn y farchnad i ddarparu triniaethau trin dwylo i ddynion a merched ac fe brynodd git trin dwylo gan ei thechnegydd ewinedd a oedd yn symud i Frasil. 

Yna trodd at Hwb Cyngor Sir Gâr a Gyrfa Cymru am arweiniad. Cyfeiriodd y ddau hi at Syniadau Mawr Cymru, gwasanaeth a ariennir gan Lywodraeth Cymru sy’n cael ei ddarparu drwy Busnes Cymru, ac sydd wedi’i ddylunio i helpu pobl ifanc ystyried a datblygu eu syniadau busnes. Mae’r gwasanaeth yn cefnogi pobl ifanc dan 25 oed, gan gynnwys myfyrwyr a graddedigion, i ystyried a datblygu syniadau busnes fel rhan o’r Warant i Bobl Ifanc. 

Yn ogystal â’i galluogi hi i fod yn greadigol, mae Sophie wrth ei bodd â’r cyfle mae rhedeg busnes newydd wedi’i roi iddi. Mae Sophie yn cynnig ystod lawn o driniaethau tylino’r Pen a’r Corff yn y dull Indiaidd, yn ogystal â thriniaethau dwylo a thraed, ac ers iddi agor mae wedi denu adolygiadau cadarnhaol di-ri. Bu’n falch iawn o gael ei rhoi ar y rhestr fer i gynrychioli Sir Gâr yng nghategori Ewinedd Jel Gorau yng Ngwobrau Swyddogol Trin Gwallt a Harddwch 2025 yn ystod yr haf. 

Mae Sophie yn gwerthfawrogi’r cymorth a’r arweiniad y cafodd gan Michela Bloomfield, Cynghorydd Busnes Pobl Ifanc. 

Dywedodd Sophie: “Mae Michela wedi bod yn gymaint o help. Dywedodd wrtha i am y Grant Dechrau Busnes i Bobl Ifanc gan Busnes Cymru a helpodd fi gyda fy nghais. Mae’r cymorth ariannol gan Syniadau Mawr Cymru wedi fy helpu i astudio ar gyfer cymwysterau’r diwydiant yn cynnwys tylino a chelf ewinedd. Gyda’r cymwysterau hyn, dw i wedi gallu prynu farnis proffesiynol OPI ac NSI, sef cynhyrchion y mae’n rhaid ichi gael cymhwyster technegydd ewinedd i’w harchebu. Dw i bellach yn gobeithio ennill cymwysterau mewn triniaeth codi’r amrannau, cwyro a lliwio aeliau. 

“Mae cwrs ar-lein ar y cyfryngau cymdeithasol hefyd wedi bod yn ddefnyddiol iawn ar gyfer arweiniad ar hysbysebu a marchnata busnes newydd mewn ardal sy’n newydd imi. Roedd dechrau busnes yn codi ofn arna i ar y dechrau, ond mae wir wedi ffynnu ac mae fy sylfaen gleientiaid wedi bod mor gefnogol.  

“Wrth imi astudio ar gyfer fy ngradd, doedd bod yn entrepreneur erioed wedi croesi fy meddwl, ond gwelais gyfle a mynd amdano. Dw i wrth fy modd â chelf, a dyna pam wnes i ei astudio fel gradd, felly mae’r gallu i fod yn artistig yn fy musnes fy hun yn fonws ychwanegol.” 

Dywedodd Michela Bloomfield, sydd wedi cefnogi Sophie: “Mae Sophie wedi dangos brwdfrydedd go iawn at ei busnes yn y cartref, o’r eiliad cyntaf inni gwrdd. Fe sylwodd hi fwlch yn y ddarpariaeth yn ei chymdogaeth newydd ac yn sydyn iawn mae hi wedi meithrin sylfaen gleientiaid ffyddlon, gan ymrwymo’n llwyr i sefydlu busnes arloesol o’r cartref. ’Da ni’n dymuno pob llwyddiant i Peaceful Polish.”