Contents
Am y grant
Mae Llywodraeth Cymru wedi ymrwymo i helpu pobl ifanc o dan 25 oed yng Nghymru, gyrraedd eu potensial gyda chymorth i gael lle mewn addysg, hyfforddiant, cymorth i gael gwaith neu i ddod yn hunangyflogedig.
Datblygwyd y Grant Dechrau Busnes i Bobl Ifanc fel rhan o'n hymrwymiad i'r Warant i Bobl Ifanc. Er mwyn sicrhau ein bod yn deall anghenion entrepreneuriaid ifanc, rydym wedi cynnal sgyrsiau gyda phobl ifanc drwy'r Llais Ieuenctid a'n Hasiantau Ieuenctid a ddywedodd wrthym fod cael gafael ar gyllid, gwybodaeth fusnes a hyder yn parhau i fod yn gyfyngiadau allweddol i ddechrau busnes.
Mae Syniadau Mawr Cymru am eich helpu i oresgyn yr heriau hyn a bydd yn chwarae rhan allweddol wrth ddarparu cymorth i bobl ifanc ddod yn hunangyflogedig. Bydd hyn yn eich helpu i ddysgu am fusnes, gweithio gyda chynghorydd i baratoi ar gyfer hunangyflogaeth ac o bosibl gael grant ariannol i'ch helpu i ddechrau.
Bydd y Grant Dechrau Busnes i Bobl Ifanc ar gael hyd at 2026 i alluogi pobl ifanc sydd ddim mewn addysg, cyflogaeth na hyfforddiant i ddechrau eu busnes eu hunain, creu menter gymdeithasol, dod yn hunangyflogedig, yn weithiwr llawrydd neu'n entrepreneur cymdeithasol yng Nghymru.
Mae grant o hyd at £2,000 ar gael i helpu pobl ifanc i ddechrau busnes. Er mwyn sicrhau bod y busnes yn cael y cyfle gorau posibl i lwyddo, bydd y grant ar gael ochr yn ochr â phecyn cymorth a fydd yn cynnwys cyngor un-i-un, gweminarau i feithrin hyder mewn arferion busnes a datblygu cynlluniau ar gyfer dechrau busnes.
Mae gan y pecyn cymorth gyfnodau dysgu diffiniedig fel y gall pobl ifanc ymuno ar y cam sy'n gweddu orau i'w hanghenion ac yn caniatáu iddynt symud ymlaen ar eu cyflymder eu hunain. Felly p'un a oes angen cymorth dwys arnoch i ddechrau arni neu gymorth tymor hwy i helpu i feddwl am ddatblygu eich syniadau busnes, gall cynghorydd drafod eich anghenion a'ch cynghori ar y llwybr gorau neu gyffyrddiad ysgafnach sy'n eich tywys drwodd i lansio eich busnes. Mae manylion y camau dysgu hyn i'w gweld isod.
Pwy all ymgeisio
Mae grant o hyd at £2,000 ar gael i helpu pobl ifanc o dan 25 oed, sy'n byw neu'n dychwelyd i Gymru i fod yn hunangyflogedig. Bydd angen i'r achos busnes ddangos bod ganddo'r potensial i ddod yn brif ffynhonnell incwm.
Mae angen i ymgeiswyr fodloni un o'r meini prawf canlynol:
- Rhaid bod yn ddi-waith a / neu ddim mewn addysg neu hyfforddiant
- Gweithio'n rhan amser ar hyn o bryd (o dan 18 awr) gyda'r bwriad o fod yn hunangyflogedig llawn amser
- Mewn addysg ond yn bwriadu bod yn hunangyflogedig o fewn 3 mis o gwblhau'r cwrs
Darllenwch nodiadau canllaw'r Grant Cychwyn i Bobl Ifanc cyn dechrau eich cais.
Ddim yn hollol barod neu angen help? Siaradwch ag ymgynghorydd Syniadau Mawr Cymru.