Sally Pierse

Mae ymwelwyr a phobl leol fel ei gilydd yn swatio i fwynhau paned a sgwrs mewn lleoliadau poblogaidd yn Aberystwyth, diolch i entrepreneur ifanc sy'n gwerthu mygiau o chai masala cartref o feic.

Lansiodd Sally Pierse, 24 oed, The Chai Bike ym mis Ebrill 2023 gyda chymorth Syniadau Mawr Cymru, ar ôl darganfod nad yw pwerau te o ran cysuro a meithrin ysbryd cymunedol wedi'u cyfyngu i de traddodiadol.      

Darganfu Sally chai am y tro cyntaf tra ar daith i India fel rhan o’i chwrs gradd BA Athroniaeth ym Mhrifysgol Caerefrog. Ochr yn ochr â mynychu darlithoedd academaidd ar hawliau menywod a Ghandi, gwahoddwyd Sally i gartref menyw leol a ddysgodd iddi ei ryseitiau Indiaidd traddodiadol, gan gynnwys masala chai. 

Wedi'i swyno gan yr ymdeimlad o gysur a chroeso a deimlai yng nghartref dieithryn hanner ffordd ar draws y byd, ysbrydolwyd Sally i ddechrau menter debyg yn ôl adref. Drwy ddewis gweithredu'n gwbl ddwyieithog drwy ei harwyddion a'i chyfryngau cymdeithasol, mae Sally yn gobeithio datblygu mwy o hyder yn ei Chymraeg tra'n annog ei chwsmeriaid i'w defnyddio yn fwy wrth ymweld â golygfeydd o ddydd i ddydd. 

Mae chai iach, cartref Sally yn cael ei storio ar feic e-gargo ac mae Sally yn annog ymwelwyr i aros o gwmpas a gwneud eu hunain yn gartrefol trwy weini'r te sbeislyd, wedi'i wneud gyda chynhwysion lleol fel mêl Cymru, te assam, sbeisys wedi'u rhostio sych a sinsir ffres, mewn mygiau seramig. 

Wrth drafod The Chai Bike, dywedodd Sally: "Ar y dechrau mae pobl yn cael eu synnu gan mai dim ond gartref neu mewn caffi - llefydd rydyn ni'n teimlo'n gartrefol ynddynt - ydych chi fel arfer yn yfed o fwgiau seramig. Ond dyna'n union pam rwy'n eu cynnig. Dwi eisiau i'm cwsmeriaid gael eu cysuro a’u  cofleidio gan harddwch Aberystwyth a thrin y lleoliadau prydferth hyn fel ein cartref ni – oherwydd dyna’n union ydyn nhw."

"Mae hefyd yn rhoi boddhad mawr i mi weld pobl yn mynd â chynaliadwyedd un cam ymhellach a hynny’n ddiarwybod iddynt. Mae fy holl gwpanau tecawê yn 100% compostadwy ac er fy mod yn dal i annog cwsmeriaid i ddefnyddio cynhyrchion y gellir eu hailgylchu a chompostio lle bynnag y bo modd, rwy'n meddwl 'pam stopio yn y fan honno yn fy nghenhadaeth i fod yn wyrddach?' Po fwyaf o gwpanau untro y gallwn eu harbed, gorau oll. Mae mwy y gallwch chi ei wneud bob amser i fyw bywyd gwyrddach."

Pan nad yw hi'n beicio o amgylch mannau siopa Aberystwyth ar ei beic e-gargo a ddarperir gan Gyngor Sir Ceredigion, mae Sally yn masnachu ym mentrau Canolfan Eco Aberystwyth, gan gynnwys cyfnewidfa dillad-eco Aberystwyth a'r caffi atgyweirio.     

Meddai Sally: "Rwyf wrth fy modd yn gweithio mewn partneriaeth â mentrau mor ymwybodol. Mae'n gyfle gwych i rannu ein cynlluniau ar sut i wneud Aber yn ganolbwynt gwyrdd gyda chymuned ffyniannus. Rwy'n credu'n gryf y gallwn, drwy weithio gyda'n gilydd, gyflawni'r nod hwn."

Wrth sefydlu The Chai Bike, cysylltodd Sally â Syniadau Mawr Cymru, gwasanaeth a ariennir gan Lywodraeth Cymru sydd, fel rhan o Busnes Cymru, yn anelu at gefnogi unrhyw un rhwng 5 a 25 oed i ddatblygu syniad busnes, gan gynnwys myfyrwyr a graddedigion, fel rhan o'i ymrwymiad i’r Warant i Bobl Ifanc.     

Cafodd Sally ei phartneru gyda'r Cynghorydd Busnes Llinos Price, a dechreuodd gael cyfarfodydd rhithwir un-i-un â hi bob wythnos. Fe wnaeth Llinos dywys Sally drwy hanfodion lansio busnes, o wneud cais am yswiriant busnes, atebolrwydd a thrwyddedau cyflogwr, hyfforddiant alergedd a sut i orau i gysylltu â'r cyngor lleol.

Fel entrepreneur Syniadau Mawr Cymru, gwahoddwyd Sally hefyd i fynychu gweithdai entrepreneuraidd, rhwydweithio â pherchnogion busnesau ifanc eraill a chlywed awgrymiadau gwych gan entrepreneuriaid llwyddiannus mewn amrywiaeth o ddiwydiannau fel rhan o Syniadau Mawr Cymru ar Daith. Cyfeiriodd Llinos hefyd at Sally at 'Trading Spaces', digwyddiad lleol yn gwahodd entrepreneuriaid ifanc i gymryd rhan mewn diwrnod o fasnachu ochr yn ochr â chyd-fusnesau. 

Wrth drafod cefnogaeth Syniadau Mawr Cymru, dywedodd Sally: "Mae Trading Spaces ac On the Move wir wedi agor fy llygaid i sut beth fyddai bywyd fel entrepreneur. Roedd pob digwyddiad yn llawn o ysbrydoliaeth ac anogaeth, chefais i ddim cyfle i fyfyrio ar fy amheuon gan eu bod yn cael eu lleddfu ar unwaith."     

Dywedodd Llinos Price, Cynghorydd Busnes gyda Syniadau Mawr Cymru: "Mae'n cymryd menyw fusnes arbennig iawn, gydag egni heintus iawn, i ysbrydoli pobl i roi'r gorau i ruthro trwy fywyd, cydio mewn mwg seramig o chai a rhoi eu traed i fyny yn lleoliadau mwyaf prydferth Aberystwyth. 

"Mae Sally yn enghraifft berffaith o sut y gallwch chi, drwy dderbyn y gefnogaeth sydd ar gael, droi eich breuddwyd fach yn llwyddiant mawr. Os ydych chi'n cymryd unrhyw beth o stori Sally, gadewch i ni i gyd werthfawrogi ein trefi genedigol a'r gymuned ynddynt yn fwy nag erioed, a gwneud yr hyn a allwn i'w helpu i ffynnu. Yn well eto, beth am ei wneud mewn pinc neon!"

Mewn ymdrech i adeiladu morâl yn lleol a helpu cwsmeriaid i roi yn ôl i'w cymuned, mae Sally wedi lansio 'Be a Brownie'. Wedi'i hysbrydoli gan ei gorffennol fel arweinydd brownies, mae'r fenter 'ei basio ymlaen' yn annog cwsmeriaid i brynu cwpanaid o masala chai i ddieithryn mewn angen ac yn hyrwyddo'r cytundeb brownie pwysig, "mae arweinydd brownies yn meddwl am eraill cyn nhw eu hunain ac yn gwneud tro da bob dydd."