Rebecca Bowyer

Mae entrepreneur 22 oed o Ynys Môn wedi bod yn helpu pobl ifanc niwroamrywiol gyda lansiad asiantaeth cymorth ac addysg arbenigol. 

Lansiodd Rebecca Bowyer, o Ynys Môn, Be Heard Communications ym mis Gorffennaf 2022 gyda chefnogaeth Syniadau Mawr Cymru, gyda chenhadaeth i addysgu mwy o bobl am niwroamrywiaeth.

Mae Rebecca, a gafodd ddiagnosis o ddyslecsia yn wyth oed ac yna awtistiaeth 10 mlynedd yn ddiweddarach, wedi bod yn cynnal sesiynau hyfforddi niwroamrywiol am ddim i fyfyrwyr nyrsio ym Mhrifysgol Bangor. Trwy helpu nyrsys newydd i ddeall cyflyrau niwroamrywiol yn well, adnabod cleifion niwroamrywiol a'r ffyrdd gorau o gefnogi unigolion sy'n niwroamrywiol, mae Rebecca'n gobeithio gwneud lleoliadau gofal iechyd yn fwy deniadol i bobl fel hi ei hun.

Ochr yn ochr â hyfforddi myfyrwyr nyrsio, mae Rebecca yn cynnig sesiynau cymorth un i un i ddysgwyr sy'n ei chael hi'n anodd mynd drwy addysg gyda chyflyrau fel dyslecsia, ADHD neu awtistiaeth. Yn ystod sesiynau un awr, a gynhelir wyneb yn wyneb a thrwy sgyrsiau ar y we, mae Rebecca'n ceisio deall cyflwr ei chleientiaid a'u tueddiadau unigol, cyn eu helpu i weithredu mecanweithiau ymdopi yn eu hamserlenni adolygu a'u harferion beunyddiol ehangach a all eu helpu i gyflawni eu nodau academaidd. 

Dywedodd Rebecca, a raddiodd yn ddiweddar gydag anrhydedd dosbarth cyntaf mewn rheoli busnes a marchnata o Brifysgol Bangor: "Mae'n frawychus faint o gamwybodaeth sy'n cael ei lledaenu am gyflyrau niwroamrywiol. Mae athrawon yn aml yn camgymryd mecanweithiau ffocws gyda bod yn aflonydd, ac mae nyrsys yn tybio mai strancio mae pobl sy’n cael ‘meltdown’. Rwyf wedi cael ffrae am  beidio â thalu sylw wrth osgoi cyswllt llygad, ac wedi cael fy holi, fwy nag unwaith, 'beth ydych chi am i mi ei wneud am y peth?' wrth wneud nyrs yn ymwybodol o'm cyflyrau.

"Am gyfnod hir roeddwn i'n teimlo'n ddig ac yn drist iawn bod pobl â chyflyrau niwroamrywiol yn cael eu cam-drin oherwydd rhywbeth na allwn ei reoli. Dyna pam yr es i ati i fod yn eiriolwr dros niwroamrywiaeth."

Er i Be Heard Communications gael ei lansio'n swyddogol yn 2022, mae Rebecca wedi bod yn cyhoeddi blogiau wythnosol ar ei gwefan ers dros dair blynedd ar bynciau fel mynd drwy addysg uwch gydag anabledd, addasiadau yn y gweithle y gall cyflogwyr eu gwneud ar gyfer staff niwroamrywiol, ac arwyddion bod myfyriwr niwroamrywiol yn ei chael hi'n anodd.

Fel myfyriwr ym Mhrifysgol Bangor, derbyniodd Rebecca gefnogaeth gan y tîm B-Enterprising i ddatblygu ei syniad busnes ac yn ddiweddarach lansiodd Be Heard Communications gyda chymorth Syniadau Mawr Cymru, gwasanaeth a ariennir gan Lywodraeth Cymru sydd, fel rhan o Busnes Cymru, yn anelu at gefnogi unrhyw un 5a 25 oed i ddatblygu syniad busnes, gan gynnwys myfyrwyr a graddedigion, fel rhan o'i hymrwymiad i’r Warant i Bobl Ifanc.

Ym mis Gorffennaf, cafodd Rebecca ei chyflwyno i'r cynghorydd busnes, Julie Williams, sydd wedi cefnogi Rebecca i ddatblygu ei busnes drwy weithredu a chwblhau cyfres o nodau bach, hylaw sy'n ei helpu i gamu y tu allan i'w pharth cysur a thyfu Be Heard Communications.

Ers gweithio gyda Syniadau Mawr Cymru, mae Rebecca wedi adeiladu cynllun busnes, wedi cofrestru fel busnes annibynnol, ac mae’r nifer sy’n ei dilyn ar y cyfryngau cymdeithasol wedi cynyddu. Mynychodd ddigwyddiad Bŵtcamp i Fusnes Syniadau Mawr Cymru fis Hydref diwethaf, lle cymerodd ran mewn gweithdai entrepreneuraidd, clywed gan bobl fusnes ffyniannus, a chyflwyno ei busnes i banel o feirniaid. 

Wrth drafod twf Rebecca fel entrepreneur, dywedodd Julie: "Pan ymunodd Rebecca â Syniadau Mawr Cymru am y tro cyntaf, ni fyddai hi erioed wedi ystyried mynychu digwyddiad fel Bŵtcamp i Fusnes. Nawr, mae hi wedi mynychu sawl digwyddiad ac mae hi hyd yn oed wedi dod yn Fodel Rôl Syniadau Mawr Cymru, gan gynnig cefnogaeth a chyngor i entrepreneuriaid niwroamrywiol eraill ac mae ei busnes yn ffynnu. Rwy'n falch o allu rhoi help llaw gan ei bod yn helpu eraill i gydnabod, cefnogi a delio gyda niwroamrywiaeth yn eu bywydau proffesiynol a chymdeithasol."

Yn ystod y misoedd nesaf, mae Rebecca'n gobeithio dechrau gweithio gydag athrawon a thiwtoriaid mewn ysgolion a cholegau lleol, gan roi'r sgiliau a'r wybodaeth ychwanegol iddynt i gydnabod a chynorthwyo dysgwyr sy'n ei chael hi'n anodd cyflawni eu potensial academaidd oherwydd niwroamrywiaeth.