Lloyd Williams

Cyflwyniad

Dydy pethau ddim yn gweithio allan bob tro fel y byddai rhywun wedi’i obeithio, felly pan dorrodd Lloyd ei ysgwydd ddwywaith y llynedd wrth wneud chwaraeon, gallai’n hawdd fod wedi rhoi'r gorau i redeg ei fusnes yn ogystal â mynd i’r ysgol. 

Yn hytrach, dechreuodd feddwl am syniadau newydd, gan helpu ei chwaer fach i werthu breichledau loom bands ar gyfer elusen, gan ddefnyddio’r sgiliau hysbysebu a rheoli arian yr oedd wedi eu dysgu o'i fusnes torri gwair a golchi ceir.

Mae rhedeg busnes yn rhywbeth sy’n dod yn gwbl naturiol i Lloyd, ac er bod gwneud arian yn wych (mae'n tueddu i fuddsoddi’r arian yn ôl yn y busnes i brynu offer, neu’n prynu rhywbeth y byddai'n ei hoffi), y cyffro o redeg busnes yw’r elfen mae'n ei fwynhau fwyaf.

Darllenwch stori Lloyd i ddarganfod beth sy'n arbennig am redeg busnes fel person ifanc, a phwysigrwydd gwneud yr hyn rydych chi’n mwynhau ei wneud...

Pam wnest ti benderfynu dechrau busnes tra’n dal yn yr ysgol?

Ers yn ddim o beth, mae Lloyd wastad wedi bod â diddordeb mewn dechrau busnes – roedd gwneud hynny fel petai’n gam naturiol iddo. Pan oedd ei ffrindiau yn chwarae gyda theganau a gemau, Lloyd oedd yr un oedd am ddyfeisio a chreu’r teganau. Roedd hefyd yn awyddus i wneud arian fel nad oedd yn rhaid iddo ddibynnu ar bobl eraill. "Mae cael busnes sy’n gwneud arian yn golygu y galla i brynu'r offer sydd ei angen arna i, a does dim rhaid i mi ddibynnu ar eraill pan fydda i’n hŷn."

Pa gefnogaeth ges ti gan deulu neu eraill wrth ddechrau?

Mae teulu, ffrindiau a chymuned ehangach Lloyd wedi bod yn hynod gefnogol i’w holl syniadau busnes a’i weithgareddau. Mae ei rieni yn ei annog i fynd amdani, ac wedi ei helpu trwy ddod o hyd i offer fel peiriant torri gwair fel y gall ddechrau arni. Maen nhw hefyd yn cefnogi chwaer iau Lloyd drwy gynnig dyblu beth bynnag mae hi'n ei godi ar gyfer elusen trwy werthu’r breichledau, felly mae hyn yn gymhelliant iddi hi a Lloyd lwyddo gyda’r fenter!

Pa gynlluniau sydd gen ti ar gyfer y dyfodol?

Mae Lloyd bellach ym Mlwyddyn 9 ac mae'n gwybod y bydd mwy o bwysau arno nawr gyda’i waith ysgol, ond mae wrth ei fodd yn gwneud gwaith gwirfoddoli trwy ei wobr Dug Caeredin gan  helpu i hyfforddi rygbi i blant dan 12. Mae'n bwriadu mynd yn ôl i’r gwaith torri gwair a golchi ceir dros yr Haf ac mae ganddo syniad ar gyfer busnes dillad hefyd, felly yn bendant dyw e ddim yn mynd i fod yn segur! Pan fydd angen jyglo gwaith ysgol a'i fusnesau, mae'n gwybod y bydd hynny'n anodd, yn enwedig adeg arholiadau TGAU, felly mae'n bwriadu siarad gyda'i rieni a chreu cynllun. Mae'n amlwg, serch hynny, fod rhedeg ei fusnes i Lloyd yn rhywbeth y mae'n ei fwynhau ac mae’n ei weld fel amser 'ymlacio' a does dim arwydd ohono yn arafu eto!

Pa gyngor fyddet ti'n ei roi i berson ifanc sy'n ystyried dechrau busnes tra'n dal yn yr ysgol?

Mae gwneud rhywbeth rwyt ti'n ei fwynhau yn bwysig iawn, felly mae rhoi cynnig ar ei wneud e’n dy helpu i weld ai dyma sy’n iawn i ti.

"Cer amdani – wnei di ddim llwyddo heb drio!"

"Rhaid i ti fwynhau’r hyn rwyt ti’n ei wneud, neu fydd e byth yn gweithio."

Rhedeg busnes yw prif ddiddordeb Lloyd ers yn blentyn, ac mae'n amlwg ei fod nid yn unig yn llawn syniadau, ond hefyd yn mynd ymlaen i’w gwireddu! Does dim amheuaeth ei fod yn datblygu sgiliau, profiad a chymeriad trwy redeg y busnesau hyn, rhinweddau a fydd yn ei helpu i lwyddo pa yrfa bynnag y bydd am ei dilyn!