Kitty Wyn Williams

CYFLWYNIAD 

Pan welodd Kitty fideo o bobl yn gwisgo gwisgoedd cymeriadau oedd yn anifeiliaid yn ôl yn 2016, fe ddeffrodd ei dychymyg. Dim ond 7 oed oedd hi, ond fe wyddai ei bod eisiau rhoi cynnig ar wneud un ei hun. A dyna'n union wnaeth hi ychydig flynyddoedd ddiweddarach, yn 10 oed! Doedd yr ymdrech gyntaf honno “ddim yr orau" mae’n cyfaddef ei hun, ond yn y blynyddoedd dilynol aeth ymlaen o wnïo â llaw i ddefnyddio peiriant gwnïo (gan addysgu ei hun), a bellach, mae’n mwynhau creu a gwerthu mygydau a gwisgoedd anifeiliaid i bobl eraill, gan eu postio i lefydd mor bell â Norwy ac Awstria. 

Pam benderfynaist ti ddechrau busnes tra'r oeddet ti'n dal yn yr ysgol?

Mae cael eich ysbrydoli gan eraill yn gallu sbarduno rhywun ac mae'n eithaf amlwg o sgwrsio â Kitty bod gwylio'r fideo yr holl flynyddoedd hynny’n ôl wedi tanio angerdd gwirioneddol dros yr hyn sydd bellach yn fusnes cosplay. Dyw cael amser i weithio ar y gwisgoedd o gwmpas gwaith ysgol ddim bob amser yn hawdd - "mae'n gallu cymryd hyd at fis i wneud y pen, traed, pawennau, cynffonnau a/neu adenydd" - ac mae hi'n mynnu bod rhaid i'r dasg fod yn bleserus, felly mae'n defnyddio amserlen i feddwl pryd mae ganddi amser sbâr. 

“Fe wnes i greu amserlen sy'n fy helpu i weld pryd mae'n bosibl i mi weithio ar y gwisgoedd o gwmpas gwaith ysgol. Mae'n hyblyg iawn serch hynny, felly dwi ddim yn becso gormod os nad yw'n gweithio fel y dylai."

Mae symud o wneud gwisgoedd i chi eich hun i'w gwneud nhw ar gyfer pobl eraill yn gam mawr, ond erbyn ei bod yn 14 oed, roedd Kitty eisoes wedi derbyn ei harcheb gyntaf ar ôl hyrwyddo ei gwaith ar y cyfryngau cymdeithasol. 

Pa gymorth wyt ti wedi'i gael gan aelodau'r teulu neu eraill wrth ddechrau? 

Mae teulu Kitty wedi bod yn gefnogol iawn ond maen nhw’n pwysleisio bod Kitty wedi gwneud popeth ei hun - o ddysgu sut i wnïo a defnyddio peiriant, i gael gafael ar ddefnyddiau a rheoli arian. Mae ei ffrindiau hi'n meddwl bod y gwisgoedd "yn sbort ac eisiau un eu hunain" ac mae ganddi restr faith o archebion. 

Beth yw dy gynlluniau ar gyfer y dyfodol? 

Mae Kitty newydd orffen yn yr ysgol ac mae’n bwriadu astudio Animeiddio a TG yn y Coleg. Mae am barhau i greu gwisgoedd cosplay hefyd – yn ei geiriau ei hun "dwi’n dal wrth fy modd, a dwi eisiau parhau â'r hwyl." 

Pa gyngor fyddet ti'n ei roi i berson ifanc sy'n meddwl cychwyn busnes tra mae'n dal yn yr ysgol?

Mater o roi cynnig arni oedd yn bwysig i Kitty, ac er nad oedd ei hymgais gyntaf gystal, roedd hi'n gwybod bod creu a chrefftio yn rhywbeth roedd hi'n ei fwynhau ac yn benderfynol o wella ei sgiliau ynddo. 

“Mae llawer yn gyndyn o fentro yn y lle cyntaf, rhag ofn nad yw [yr hyn rydych chi'n ei wneud] ddigon da. Efallai na fydd yn berffaith i ddechrau, ond rhoi cynnig arni yw'r peth gorau allwch chi ei wneud. Os na ddechreuwch chi, fyddwch chi byth yn gwybod sut beth yw e."

Wrth siarad â Kitty, does dim dwywaith ei bod hi'n mwynhau creu mygydau a gwisgoedd cosplay yn fawr, ond mae ganddi hefyd feddylfryd gwych wrth wneud yn siŵr ei bod hi'n realistig o ran cydbwyso'r amser â'i gwaith ysgol. Ar ôl gweld ffotograffau o'i gwaith, gallaf ddweud yn gwbl onest fy mod i'n gegrwth o weld y ddawn sydd ganddi. Mae Kitty wedi canfod rhywbeth mae hi wir yn ei fwynhau, ac wedi ffeindio ffordd o droi hynny'n fusnes ymarferol. Ochr yn ochr â'i brasluniau a'i darluniau, mae'n "un i'w gwylio" yn y dyfodol, heb os nac oni bai!