Isabella Jackson

Mae dynes 24 oed o Abergele wedi saernïo’r rysáit berffaith ar gyfer llwyddiant ar ôl sefydlu ei becws cartref.  

Sefydlodd Isabella Jackson The Welsh Squirrel Bakery ym mis Hydref 2023 ac mae’n arbenigo mewn cynnyrch pob cartref, yn cynnwys y clasuron traddodiadol fel sbwng Fictoria, teisennau bach a chacennau dathlu ffondant, yn ogystal â chynigion fegan fel byns sinamon a chwcis.  

Mae’r pobydd medrus yn awtistig. A hithau’n sensitif i sŵn ac yn aml yn teimlo bod rhyngweithiadau cymdeithasol yn anodd, dyma a ysgogodd hi i ystyried hunangyflogaeth.  

Yn sensitif i sŵn ac yn aml yn teimlo bod rhyngweithiadau cymdeithasol yn anodd, penderfynodd Isabella ystyried hunangyflogaeth. 

Dywedodd Isabella: “Pan oeddwn i’n blentyn, arferwn i helpu mam yn y gegin ac rydym yn dal i bobi gyda’n gilydd. Mae fy nheulu, ac yn enwedig fy mam, wedi bod yn hanfodol drwy gydol y daith ac wedi fy nghefnogi bob amser. Mae fy mam yn fy helpu gydag agweddau cyfathrebu ar redeg busnes yn ogystal â fy nghynorthwyo yn y gegin. Mae hi hefyd yn fy helpu i redeg fy sianeli cyfryngau cymdeithasol.” 

Ers agor, mae Isabella wedi cael dros 100 o archebion ac mae caffi fegan lleol yn Llandudno wedi gofyn iddi eu cyflenwi â rhai o’i chynnyrch pob fegan poblogaidd.  

Sefydlodd Isabella The Welsh Squirrel Bakery gyda chymorth Syniadau Mawr Cymru, gwasanaeth a ariennir gan Lywodraeth Cymru sydd, fel rhan o Busnes Cymru, yn anelu at roi cymorth i unrhyw un rhwng ​​16 a 24 oed i ddatblygu syniad busnes, gan gynnwys myfyrwyr a graddedigion, fel rhan o’i ymrwymiad i’r Warant i Bobl Ifanc.  

Yn fuan wedi iddi gysylltu â Syniadau Mawr Cymru, cafodd Isabella ei pharu â Chynghorydd Busnes, sef Peter Donovan, sydd wedi bod yn ei helpu ers hynny i greu cynllun busnes a bwrw drwy'r elfennau cyfreithiol sy’n dod law yn llaw â bod yn berchennog ar fusnes. Peter a gyflwynodd Isabella i’r Grant Dechrau Busnes i Bobl Ifanc a’i helpu gyda’i chais. Ar ôl llwyddo i ennill y grant, defnyddiodd yr arian i brynu cyfarpar pobi angenrheidiol ar gyfer ei chegin.  

Meddai: “Mae Syniadau Mawr Cymru wedi bod yn rhan annatod o fy helpu i sefydlu The Welsh Squirrel Bakery. Mae’r cyngor dw i wedi ei gael wedi bod yn galonogol ac yn ddefnyddiol yn gyson. Dw i’n ddiolchgar iawn i Syniadau Mawr Cymru am yr holl gymorth.” 

Ychwanegodd Peter Dovan, Cynghorydd Busnes: “Dw i’n falch iawn o’r cynnydd mae Isabella wedi ei wneud gyda’i busnes ers ei sefydlu ym mis Hydref. Gyda system deuluol mor gefnogol, mae ei becws yn mynd o nerth i nerth, a dw i’n dymuno pob llwyddiant iddi gyda’i hymdrechion yn y dyfodol.”  

Ar hyn o bryd mae Isabella yn rhoi cynlluniau ar waith i fynychu marchnadoedd ac mae wedi cofrestru i gynnal stondin dros dro yn y Ffair Nadolig yn Eglwys Sant Michael yn Abergele. Mae hi hefyd yn bwriadu cyflenwi rhagor o’i danteithion pob i gaffis yn yr ardal leol, gyda’r breuddwyd o agor ei siop de draddodiadol ei hun yn y dyfodol.