Ioan Tomos Morgan

Sector:: Bwyd a Diod
Rhanbarth:: Abertawe

Cyflwyniad

Beth ydych chi'n ei wneud pan fyddwch chi wir eisiau rhywbeth ond does gennych chi mo’r arian i'w brynu? Dyma ysbrydolodd Ioan i ddechrau ei fusnes pobi brownis, ac er iddo gyflawni ei nod yn eithaf cyflym, mae wedi parhau gyda'r busnes ac mae ganddo gynlluniau i’w ehangu ar ôl iddo sefyll ei arholiadau TGAU. Dyma hanes Ioan...

Pam wnest ti benderfynu dechrau busnes tra’n dal yn yr ysgol?

Roedd Ioan eisiau clustffonau Realiti Rhithwir er mwyn ymuno â'i ffrindiau a oedd eisoes yn eu defnyddio, ond roedd yn gwybod y byddai'n rhaid iddo gynilo i’w prynu. Cofiodd fel yr oedd e a'i fam wrth eu bodd yn pobi ac yn chwilio am rywbeth ychydig yn wahanol i'r hyn oedd eisoes ar gael, a daeth y syniad o bobi a gwerthu brownis i godi arian. A dyna gychwyn ar All That Sweet Stuff ac er iddo bobi a gwerthu digon o frownis i brynu ei glustffonau VR yn gyflym iawn, daliodd ati gyda'r pobi ac mae'n mwynhau rhedeg y busnes, a gwerthu’r brownis yn ei ardal leol.

Pa gefnogaeth ges ti gan deulu neu eraill wrth ddechrau?

Mae mam Ioan wedi rhoi llawer o help llaw iddo – maen nhw'n pobi'r brownis gyda'i gilydd, ac mae hi'n rheoli ei dudalen Facebook. Mae ei deulu a'i ffrindiau agos eraill i gyd yn gefnogol iawn hefyd, gyda’i fam-gu yn profi ryseitiau newydd ac yn rhoi gwybod ei barn. Ei ffrindiau yw rhai o'i gwsmeriaid gorau ac maen nhw’n meddwl bod y ffaith ei fod yn rhedeg busnes yn reit ddiddorol ac yn eithaf cŵl!

Pa gynlluniau sydd gen ti ar gyfer y dyfodol?

Gyda Ioan nawr ym Mlwyddyn 10, mae’n gwybod y bydd hi'n anoddach cadw'r busnes i fynd ar adegau penodol pan fydd angen iddo ganolbwyntio’n bennaf ar brofion ac arholiadau yn yr ysgol, ond mae’n bwriadu parhau i bobi a gwerthu pan fydd yna gyfle. Ei nod nesaf yw prynu trelar coffi erbyn iddo orffen Blwyddyn 11 yn yr ysgol, ac er ei fod yn gwybod nad yw'n hawdd rhedeg busnes, rhywbryd yn y dyfodol hoffai wneud hynny yn llawn amser.

Pa gyngor fyddet ti'n ei roi i berson ifanc sy'n ystyried dechrau busnes tra'n dal yn yr ysgol?

Roedd Ioan yn gwybod bod llawer o bobl leol yn gwneud cacennau, ond doedd neb yn gwerthu brownis felly dyna pam y penderfynodd eu dewis. Cynnig rhywbeth sy’n wahanol i'ch cystadleuwyr yw ei brif gyngor:

"Mae cystadlu yn erbyn busnes arall yn gallu bod yn her, felly chwilia am rywbeth gwahanol, a rhywbeth y bydd pobl yn ei hoffi."

Paragraff i gloi:

Gall rhedeg busnes weithiau deimlo braidd yn unig, felly mae cael rhywun wrth eich ochr i'ch helpu a'ch cefnogi yn gwneud gwahaniaeth mawr. Mae Ioan wrth ei fodd fod rhedeg y busnes yn golygu y gall dreulio amser hwyliog gyda'i fam, a does dim amheuaeth eu bod nhw’n gwneud tîm gwych! Mae ei nod nesaf, sef prynu trelar coffi, yn bendant yn realistig, ac rydyn ni’n dymuno'r gorau iddo pan fydd yn mynd â’i frownis hyfryd allan ar y ffordd.