Harley Lloyd-Cooksley

Cyflwyniad

Weithiau dechrau busnes yw'r unig ffordd i ennill ychydig o arian pan nad ydyn ni’n ddigon hen i gael ein cyflogi gan rywun arall. Dyma beth ddigwyddodd i Harley pan sylweddolodd yn 11 oed nad oedd hyd yn oed yn cael gwneud rownd bapur leol. Mae wedi rhoi cynnig ar ambell syniad busnes ers hynny, ond ar hyn o bryd mae ganddo fusnes ar-lein sy'n gwneud arian ac mae'n mwynhau'n fawr. Dyma hanes busnes Harley a'r hyn sy'n ei ysbrydoli a'i ysgogi i ddal ati yn ogystal â gwneud ei waith ysgol.

Pam wnest ti benderfynu dechrau busnes tra’n dal yn yr ysgol?

Roedd Harley yn awyddus i gael swydd pan oedd yn 11 oed, i gael rhywfaint o arian ei hun, a hefyd er mwyn ennill digon o arian i helpu ei rieni i ymddeol! Doedd e ddim hyd yn oed yn ddigon hen i gael gwneud rownd bapur, felly dechreuodd ei fusnes golchi ceir ei hun (sy'n dal i fynd hyd heddiw) ac mae wedi ceisio ennill arian hefyd o gynlluniau cysylltiedig. Ym mis Chwefror 2025, dechreuodd ei fusnes ar-lein ei hun yn prynu cynhyrchion cyfanwerthu ac yna eu gwerthu ar ei wefan gan ddefnyddio model 'dropshipping' (sef y cyfanwerthwr yn anfon yr archebion allan fel nad yw Harley yn dal unrhyw stoc, gydag yntau’n derbyn yr arian o bob gwerthiant llai y gost gyfanwerthu). Mae wedi bod yn mynd yn dda, ac mae'n mwynhau darganfod cynhyrchion poblogaidd a’u gwerthu ar ei wefan.

Pa gefnogaeth ges ti gan deulu neu eraill wrth ddechrau?

Daeth y rhan fwyaf o'r gefnogaeth mae wedi'i chael i redeg y busnes gan gymunedau ar-lein – trwy gysylltu â phobl sydd eisoes yn gwneud y math yma o beth a chael eu cyngor. Mae angen bod yn ofalus pa rai i’w defnyddio a beth sy'n cael ei ddweud, ond mae wedi postio ei wefan yn ddiweddar i gael adborth ar sut i’w gwella, ac roedd hynny'n ddefnyddiol iawn. Mae’n cael pob cefnogaeth gan ei deulu a'i ffrindiau, ac maen nhw’n ei annog i ddal ati. Mae bod yn ddisgybledig a chanolbwyntio ar yr hyn y mae'n ei wneud yn bwysig er mwyn cynnal ei frwdfrydedd.

Pa gynlluniau sydd gen ti ar gyfer y dyfodol?

Mae Harley yn bwriadu parhau i ddatblygu'r wefan ac ehangu'r amrywiaeth o gynhyrchion sydd ar gael trwy'r model 'dropshipping'. Mae wedi tyfu'r busnes hyd yma trwy dwf organig (postio riliau a fideos ar Instagram, Facebook, YouTube, a TikTok) yn hytrach na thalu am hysbysebion ac mae'n dweud, "Rwyt ti'n dysgu rhai sgiliau wrth fynd ymlaen ac wedyn yn eu cymhwyso nhw i'r busnes".

Pa gyngor fyddet ti'n ei roi i berson ifanc sy'n ystyried dechrau busnes tra'n dal yn yr ysgol?

Yn ôl Harley, does yna’r un cynllun sy’n gwneud rhywun yn gyfoethog dros nos ac mae’n teimlo bod angen cael incwm o sawl ffynhonnell i ddod yn gyfoethog. Felly, rhaid dechrau arni, bod yn ddisgybledig, a chael ysbrydoliaeth gan eraill.

"Rhaid mynd amdani, ac wedyn mae modd gweld faint o amser sydd gennych chi i roi i’r busnes."

"Chwiliwch am ysbrydoliaeth gan bobl eraill - mae gan un o fy ffrindiau ei fusnes ei hun sy’n defnyddio 'dropshipping' a dyna wnaeth fy ysbrydoli i ddechrau fy musnes fy hun."

Paragraff i gloi: 

Mae llawer o bobl ifanc yn breuddwydio am ddechrau busnes, ond dydy’r mwyafrif ddim yn gwneud dim am y peth. Mae Harley wedi cael ei ysbrydoli gan eraill ac wedi darganfod ei gyfleoedd ei hun a phenderfynu mynd amdani! Mae ei ffocws a'i ddisgyblaeth yn anhygoel, ac mae ei allu i addasu'r busnes yn ôl y tueddiadau diweddar yn arbennig. Pob llwyddiant i Harley wrth iddo wireddu ei holl freuddwydion!

Dyfyniadau

"Yr her fwyaf yw disgyblaeth - mae llawer o bobl yn siarad ond yn gwneud dim am y peth."

"Mae brwdfrydedd Harley [am ei fusnes] yn ddi-baid, mae’n amlwg ei fod ar ei feddwl drwy'r amser." 

Tiwtor Dosbarth Harley