Evan Richards and Lewis Morgan

Mae deuawd o Abertawe yn paratoi ar gyfer ail dymor o lwyddiant, ar ôl lansio cwmni rhentu cyfarpar ar gyfer chwaraeon dŵr poblogaidd gyda chefnogaeth Syniadau Mawr Cymru.

Mae Gower Waves yn gwmni rhentu padlfyrddau sefyll symudol sy'n darparu offer ar draws pob un o'r 26 o draethau ym Mro Gŵyr, o Langland a Bae Abertawe i Caswell a Bae Oxwich.

Y tu ôl i'r busnes mae ffrindiau gorau Evan Richards, 20, a Lewis Morgan, 19 o Abertawe. Lansiodd y pâr Gower Waves yn gynnar yn 2023 yn ystod blwyddyn i ffwrdd a threulio'r haf yn gyrru o draeth i draeth yn danfon padlfyrddau wedi’u teilwra’n arbennig i ymwelwyr a selogion chwaraeon dŵr, gan fanteisio ar boblogrwydd cynyddol y gamp.

Yr haf diwethaf, roedd Gower Waves yn rhentu hyd at wyth o badlfyrddau y dydd. Erbyn mis Medi, roedd y busnes wedi gwneud dros £2k o rentu, a £2k arall drwy werthu hwdis Gower Waves. Eleni, mae Evan a Lewis yn paratoi ar gyfer tymor yr un mor brysur, gyda chynlluniau i fuddsoddi elw i ehangu’r cyfarpar y maent yn eu rhentio i gaiacau a byrddau syrffio.

Cododd poblogrwydd padlfyrddio, ynghyd â gweithgareddau chwaraeon dŵr eraill fel caiacio a syrffio yn 2021 wrth i gyfyngiadau teithio yrru pobl leol i'w traeth agosaf. O ganlyniad, cododd nifer y bobl sy'n padlfyrddio yn y DU o 3,785 i 7,272* a daeth Gŵyr, gyda'i 25 o draethau, yn lle poblogaidd i selogion padlo diolch i'w dyfroedd tawel, clir a gwyntoedd ysgafn.

Meddai Evan Richards: "Fe wnaeth Lewis a minnau dyfu i fyny gyda'n gilydd. Fe wnaethom gyfarfod yn Ysgol Gyfun Llandeilo Ferwallt ac aethom i gampws Gorseinon Coleg Gŵyr Abertawe gyda'i gilydd. Rydyn ni'n debyg iawn i’n gilydd, felly pan ddaeth hi i gymryd blwyddyn i ffwrdd, roedd y ddau ohonom eisiau gwneud rhywbeth a fyddai o fudd i ni yn y dyfodol ond oedd yn hwyl hefyd. Mae gennym gymaint o atgofion melys o syrffio a chaiacio ar y traeth, felly fe benderfynon ni lansio busnes a oedd yn galluogi eraill i gael yr un profiadau a gwneud yr un atgofion."

Wrth siarad am brofiad cwsmeriaid Gower Waves, dywed Lewis Morgan: "Yn ein profiad ni, mae rhentu yn boblogaidd iawn ymhlith padlwyr tro cyntaf sydd ddim am wario ffortiwn ar offer dim ond i roi cynnig ar y gamp. Rydyn ni wrth ein bodd yn mynd allan yna a chwrdd â'n cwsmeriaid, rhannu ein cariad tuag at y dŵr, ein cyngor ac, yn bwysicaf oll, trafod bod yn ddiogel yn y dŵr."

Lansiodd Evan a Lewis Gower Waves gyda chefnogaeth Syniadau Mawr Cymru, gwasanaeth a ariennir gan Lywodraeth Cymru sydd, fel rhan o Busnes Cymru, yn anelu at gefnogi pobl ifanc 25 oed ac iau i ddatblygu syniad busnes fel rhan o'i ymrwymiad i'r Warant i Bobl Ifanc.

Fe wnaeth y ffrindiau gorau a drôdd yn bartneriaid busnes estyn allan i Syniadau Mawr Cymru yn gynnar yn 2023 a chawsant eu paru ar unwaith gyda'r cynghorydd busnes Michela Bloomfield a'u helpodd i ddatblygu cynllun busnes, sicrhau yswiriant busnes a chreu hepgoriad cyfreithiol rwymol sydd, unwaith y caiff ei llofnodi gan gwsmeriaid, yn eu hamddiffyn os bydd eiddo’n mynd ar goll neu ddamweiniau’n digwydd.

Fe wnaeth Michela hefyd gyfeirio Evan, sy'n gweithio'n rhan-amser fel Rheolwr Dyletswydd mewn gwesty lleol, i Grant Dechrau Busnes ar gyfer Pobl Ifanc. Rhoddodd y pâr yr arian tuag at fyrddau padlo penodol ar gyfer Gower Waves. Defnyddiodd Evan a Lewis y cyllid a oedd yn weddill i argraffu taflenni busnes yn broffesiynol, ac fe’u dosbarthwyd mewn gwersylloedd lleol, llety rhent ar gyfer gwyliau a siopau, a phosteri canfas a osodwyd o amgylch traethau mwyaf poblogaidd Gŵyr.

Wrth drafod cefnogaeth Michela, dywedodd Evan: "Mae cael help cynghorydd busnes profiadol wedi gwneud byd o wahaniaeth i'n busnes newydd. Heb Michela, allwn ni ddim peidio â theimlo y byddem ni bum cam ar ei hôl hi. Nid oedd gan yr un ohonom unrhyw syniad sut i redeg busnes yn llwyddiannus, ond gyda chefnogaeth Syniadau Mawr Cymru gall unrhyw un ddod yn entrepreneur llwyddiannus. Ni allwn ddiolch digon iddynt am ein helpu i droi ein hangerdd yn realiti."

Ochr yn ochr ag ehangu eu cynnig rhent, nod hirdymor Evan a Lewis yw sicrhau digon o elw i brynu eu fan eu hunain a chyfleusterau storio ffisegol ar draethau ledled Gŵyr, er mwyn ei gwneud yn haws iddynt gadw a chludo eu cynnyrch.

Dywedodd yr ymgynghorydd busnes Michela: "Bob dydd rwy'n gweithio gydag entrepreneuriaid nad oes ganddynt unrhyw brofiad blaenorol o redeg busnes. Mae Evan a Lewis yn enghraifft berffaith o sut y gall unrhyw un, gyda'r gefnogaeth a'r ymroddiad cywir, ddod yn entrepreneuriaid llwyddiannus a throi eu hangerdd yn incwm. Mae eu stori yn dyst y gall unrhyw angerdd neu hobi fod yn fusnes ffyniannus."