Caitlyn Jones

Mae mam 25 oed o Abertawe’n paratoi ar gyfer cyfnod prysur wrth i’r plant ddychwelyd i’r ysgol, am fod ei busnes yn cyflenwi rhoddion wedi eu personoleiddio. 

Lansiodd Caitlyn Jones Threee Little Birdies ddiwedd Tachwedd 2023, ac mae’n arbenigo mewn cynnyrch tymhorol wedi ei deilwra. Mae ei chynnyrch Dychwelyd i’r Ysgol yn cynnwys sachau cefn wedi eu personoleiddio, gyda’r opsiwn o ddewis lliw a phersonolieiddio’r motiff ac enw’r plentyn.

Mae sachau rhoddion mintai priodas Caitlyn wedi bod yn arbennig o boblogaidd yr haf yma, ac mae pob un yn cynnwys gŵn sidan, cambren, slipers, gwydr siampên a bag wedi eu personoleiddio.

Cynorthwyydd dosbarth oedd Caitlyn, a rhoddodd yr enw Three Little Birdies i’r busnes ar ôl llysenw ei thad iddi hi a’i chwiorydd pan oedden nhw’n blant.

Dywedodd Caitlyn: “Ar ôl dod yn fam, roeddwn i am gael mwy o reolaeth dros fy amser a fy amserlen. Roeddwn i am fod gartref gyda fy mhlant, ond rwy’n llawn mynd hefyd. Doeddwn i ddim am roi’r gorau i weithio’n llwyr.

Gan gydnabod poblogrwydd rhoddion tymhorol wedi eu personoleiddio yn sgil y diwylliant ‘creu atgofion’, dechreuodd Caitlyn ddylunio rhoddion Nadolig, Sant Ffolant a Phasg.

Yn y bwndel priodasol, mae enwau’r unigolion yn cael eu brodio ar y gŵn sidan, y slipers a’r bag, ac yn cael eu peintio ar y cambren a’r gwydr yn ôl gofynion y cwsmer. 

Dywedodd Caitlyn: “Rydw i wastad wedi bod eisiau bod yn fos arnaf fi fy hun am fy mod i’n dod o deulu o berchnogion busnes. Rhoddodd fy rhieni gymorth i mi ymchwilio i ffyrdd o fynd ati, ac fe ffeindion ni Busnes Cymru. Am fy mod i o dan 25 oed, cyfeiriodd y tîm fi at Syniadau Mawr Cymru. 

“Ar ôl cyfarfod â fy Ymgynghorydd Busnes, Amanda, argymghellodd fy mod i’n ymgeisio am Grant Dechrau Busnes i Bobl Ifanc. Ochr yn ochr â’r grant, gallwch fanteisio ar gymorth fesul un gan ymgynghorydd busnes pwrpasol, yn ogystal â gweithdai i fagu hyder mewn busnes ac arweiniad i ddatblygu cynllun busnes. Allwn i ddim fod wedi dechrau fy musnes heb y grant fel buddsoddiad cychwynnol ac arweiniad Amanda.”

Dywedodd Ymgynghorydd Syniadau Mawr Cymru, Amanda Bordessa: “Mae Caitlyn yn berson penderfynol iawn ac mae ganddi lygad brwd am fanion. Rwy’n credu ei bod hi wedi ymroi i gynhyrchu’r cynnyrch gorau posibl, sy’n hollol ddilys ac yn gyson â’i gwerthoedd personol ar gyfer ei busnes. Rwy’n edrych ymlaen yn fawr at weld sut mae Three Little Birdies yn datblygu yn y dyfodol, ac yn dymuno pob llwyddiant iddi.”