Aislinn O'Brien

Cyflwyniad

Os wyt ti’n meddwl tybed ydy dechrau busnes tra'n dal yn yr ysgol yn beth da, mae’n werth bwrw golwg ar stori Aislinn, a ddechreuodd ei busnes yn ddim ond 10 oed, a darllen sut mae hi’n elwa, ond hefyd sut mae ei chymuned leol a hyd yn oed y blaned yn elwa hefyd!

Pam wnest ti benderfynu dechrau busnes tra’n dal yn yr ysgol?

Daeth y syniad i Aislinn i ddatblygu eli naturiol ar gyfer gwefusau trwy ddefnyddio cynhwysion lleol fel cwyr gwenyn ar ôl sylwi bod ei ffrindiau yn defnyddio eli wedi'i wneud o gynhwysion synthetig neu betrolewm a bod hyn yn achosi mwy o broblemau a gwneud i’r croen bilio. Roedd hi’n credu y gallai greu rhywbeth gwell gan ddefnyddio cynhwysion naturiol a dyma fwrw iddi!

Ffair Wyddoniaeth yr ysgol leol oedd y sbardun ar gyfer dechrau'r busnes ac mae'n edrych ymlaen at weithio gyda dwy o'i ffrindiau yn y digwyddiad yn Haf 2025 lle byddan nhw’n gofyn i ymwelwyr am eu barn ar y cynnyrch a pha rai maen nhw’n eu hoffi fwyaf.

Mae gweithio ar y busnes a hithau’n dal yn yr ysgol yn golygu bod rhaid bod yn realistig ynglŷn â'r hyn y gellir ei wneud a phryd, ond fel mae Aislinn yn ei ddweud, "mae gwyliau’r ysgol gyda ni".

Er bod mynd ati i ddechrau busnes yn gyffrous iawn, mae Aislinn hefyd yn cael ei sbarduno ymlaen am ei bod yn gweld sut y gall hyn helpu eraill yn y gymuned trwy ddefnyddio cynhwysion lleol, ac y gall roi’r elw y bydd yn ei wneud o'r busnes i elusen canser genedlaethol.

Pa gefnogaeth ges ti gan deulu neu eraill wrth ddechrau?

Mae teulu Aislinn wedi bod yn gefnogol iawn i’w chynlluniau, ac wedi ei helpu i ddod o hyd i gyflenwadau lleol, paratoi'r gwahanol fformiwlâu ar gyfer yr eli, a chreu cynllun. Mae'r ysgol hefyd wedi bod yn wych ac mae Evelyn ac Elsie ei ffrindiau yn hwb mawr iddi.

Pa gynlluniau sydd gen ti ar gyfer y dyfodol?

Mewn blwyddyn arall, mae Aislinn yn gobeithio darparu dewis o gynhyrchion i'w gwerthu yn yr ardal leol, ond mae'n cydnabod pa mor bwysig yw pwyllo a chymryd amser i ddatblygu ei syniadau. Mae hi'n credu y bydd digon o alw am ei chynhyrchion gofal croen naturiol sy’n defnyddio cynnyrch lleol, a'i gweledigaeth hirdymor yw ehangu’r busnes y tu hwnt i'r gymuned leol.

Pa gyngor fyddet ti'n ei roi i berson ifanc sy'n ystyried dechrau busnes tra'n dal yn yr ysgol?

Yn ôl Aislinn, mae wedi bod yn bwysig cymryd amser i weithio allan a oes yna angen go iawn i’w ddiwallu, ac yna gwneud cynllun, yn ogystal â chredu y gallwch chi wneud i rywbeth weithio. Y ddau brif awgrym sydd ganddi yw:

"Mae'n well cymryd yr amser i gael yr ateb cywir, na rhuthro a chael yr ateb anghywir!"

"Mae angen i chi gredu ynoch chi eich hun"

Mae Aislinn yn amlwg yn ferch ifanc gydag uchelgais, gyda chalon garedig, ac edrychwn ymlaen at weld sut mae ei busnes yn datblygu.