Abigail Rooke

Mae celf wedi dod yn therapi i Abigail Rooke sydd wrth ei bodd ag anifeiliaid. A hithau wedi sefydlu Rooke’s Pet Portraits, mae Abigail bellach yn peintio ag olew yn llawn amser, gyda diolch i gymorth Syniadau Mawr Cymru. 

Er ei bod wedi datblygu Tacycardia uwchfentriglaidd, cyflwr parhaus lle mae'r galon yn curo yn llawer cynt na’r arfer ac yn afreolaidd, yn ystod ei chwrs gradd Celfyddyd Gain a Dylunio, graddiodd Abigail a symud ymlaen i gwrs Hyfforddiant Athro cyn iddi sylweddoli ar gyfyngiadau ei chyflwr a chanfod pa mor heriol fyddai parhau i astudio.  

Mae Abigail yn gaeth i’w chartref ond oherwydd cymorth gan Syniadau Mawr Cymru, mae wedi llwyddo i ddod yn entrepreneur drwy ei hangerdd.  

“Doedd parhau â fy astudiaethau ddim y llwybr iawn imi,” dywedodd Abigail. “Wrth fod yn gaeth i’r tŷ, ac yn sâl iawn, mae dechrau fy musnes fy hun wedi fy ngalluogi i greu’r amgylchedd gweithio delfrydol imi. Mae gweithio i fi fy hun yn fy ngalluogi i weithio’r oriau o fy newis pan dw i’n teimlo fy mod yn gallu. A heb fod yn atebol i bobl eraill, does gen i ddim straen ychwanegol a dydw i ddim yn pryderu am siomi pobl.” 

Mae’r Grant Dechrau Busnes i Bobl Ifanc wedi galluogi Abigail i droi ei sied yn stiwdio gartref ac i greu pamffledi a chardiau busnes. 

Meddai: “Roeddwn i’n peintio i dynnu fy meddwl oddi ar boen meddwl fy niagnosis a sylweddolais y gallaf fanteisio i’r eithaf ar fy ngwaith celf. Gan fy mod yn gwneud portreadau a brasluniau inc i deulu a ffrindiau i gadw’n brysur, sylweddolais y gallwn gynnig hynny i gylch ehangach o gleientiaid.” 

Mae Abigail wedi ymrwymo i Addewid Twf Gwyrdd Syniadau Mawr Cymru ac mae’n chwilio drwy siopau elusen yn ei milltir sgwâr am gynfasau i’w hail-ddefnyddio neu mae’n rhoi pwrpas newydd i rai o adran Gelf ei hen ysgol. Mae hefyd yn defnyddio coed lleol a chynaliadwy i wneud fframiau, ac mae’n eu gosod at ei gilydd yn defnyddio offer y mae modd eu hail-wefru ac yn golchi ac yn ailddefnyddio ei brwshys am gyn hired ag y bo modd. 

Mae Abigail yn byw gyda’i theulu yn Ynys Môn lle mae eu cartref yn cael ei bweru gan ynni solar. Mae'r cwbl wrth eu bodd ag anifeiliaid ac mae ganddynt chwe chath a thri chi. Meddai: “Yn fy sied, dw i’n mynd i fyd gwahanol, diolch i’r cyngor busnes a gefais gan Caryl George, fy Nghynghorydd Busnes, a arweiniodd fi drwy’r camau ar gyfer marchnata ac ariannu busnes newydd fel fy un i. 

“Doedd gen i ddim syniad lle i ddechrau, ond ers iddi fy helpu, fy nhywys drwy sut i farchnata fy musnes ar y cyfryngau cymdeithasol, dw i heb edrych yn ôl. Darparodd y cwrs Cyfrifon a Chadw Llyfrau, a oedd ar gael drwy Syniadau Mawr Cymru, wybodaeth gyfredol am ba ffurflenni fyddai angen imi eu llenwi i sicrhau bod fy musnes yn ddilys, sut i gadw golwg ar fy incwm a fy nhaliadau, yn ogystal â beth ddylid ei wneud o ran treth.” 

Mae ychydig o waith Abigail yn cael ei arddangos yn Stiwdio Artisan Amlwch ac mae hi hefyd wedi agor cyfrif ar y platfform Etsy.  

Mae Caryl wedi cefnogi Abigail drwy wneud addewidion Cydraddoldeb a Thwf Gwyrdd Busnes Cymru a dywedodd: “Mae Abigail wedi dangos dewrder a chryfder go iawn i oresgyn ei heriau iechyd, gan wneud ei gorau glas wrth sefydlu busnes arloesol o’i chartref. Mae ei phaentiadau yn brawf o’i dawn, ac rydym yn dymuno pob llwyddiant iddi wrth i Rooke’s Pet Portraits ddatblygu a thyfu fel busnes.”