Mae gan Lywodraeth Cymru aelodaeth gorfforaethol gyda Rhaglen Cyswllt Diwydiannol (ILP) Sefydliad Technoleg Massachusetts (MIT). Trwy aelodaeth ILP Llywodraeth Cymru, gall unrhyw fusnes, entrepreneur neu fusnes cyn refeniw sydd â sylfaen weithredu yng Nghymru wneud y canlynol: -
- Cael mynediad at sylfaen wybodaeth MIT o ymchwil, cyhoeddiadau a chynnwys fideo trwy wefan pwrpasol ILP MIT
- Mynychu a chael mynediad am ddim i gynadleddau MIT
- Mynychu digwyddiadau Llywodraeth Cymru a drefnir gyda chyfadran MIT sy'n ymweld
- Mynychu Cynadleddau ILP MIT yn y cnawd a gwneud cais am grant Llywodraeth Cymru i gynorthwyo gyda chostau teithio a llety (gweler isod am ragor o wybodaeth)
Y Rhaglen Cyswllt Diwydiannol
Mae ILP yn fecanwaith ar gyfer ymgysylltu a chydweithredu â busnesau a ddefnyddir gan MIT i feithrin rhwydweithiau a datblygu cysylltiadau â busnesau ledled y byd.
Gellir defnyddio ILP i fanteisio ar gyfoeth o wybodaeth sydd gyda'r gorau yn y byd trwy fynediad at aelodau cyfadrannau yn ogystal â rhwydwaith ehangach ILP o gwmnïau ar raddfa fyd-eang.
Mae partneriaeth Llywodraeth Cymru ag ILP MIT yn cynnig cyfle heb ei ail i fusnesau Cymru gysylltu ag un o sefydliadau ymchwil mwyaf blaenllaw'r byd.
Os ydych chi'n gorfforaeth fawr neu'n fusnes sefydledig sy'n ceisio parhau i fod yn gystadleuol ac arloesol, neu os ydych chi'n BBaCh sy'n ceisio ehangu a gwella eich gweithrediadau, gallwch elwa drwy aelodaeth ILP Llywodraeth Cymru. Mae mynediad hefyd ar gael i entrepreneuriaid a busnesau newydd sy'n ceisio cyflymu llwybr twf a thimau ymchwil a datblygu mewn busnesau, prifysgolion a sefydliadau ymchwil.
Sefydliad Technoleg Massachusetts (MIT)
Mae Sefydliad Technoleg Massachusetts (MIT) yn cael ei gydnabod yn fyd-eang fel un o'r sefydliadau ymchwil ac academaidd mwyaf blaenllaw yn y byd.
Mae'n anelu at ‘hybu gwybodaeth a pharatoi myfyrwyr ym maes gwyddoniaeth, technoleg a meysydd astudio eraill a fydd o'r budd gorau i'r genedl a'r byd heddiw’.
Argaeledd Grant
Mae Llywodraeth Cymru hefyd yn cynnig nifer cyfyngedig o grantiau ariannol i gyfrannu tuag at deithiau awyr a llety i gynrychiolwyr sy'n mynychu cynadleddau neu ddigwyddiadau wyneb yn wyneb ILP MIT sy'n digwydd y tu allan i'r DU. Ar gyfer yr ymgeisydd neu'r ymweliad cyntaf, mae'r grant yn talu hyd at 50% o'r costau gwirioneddol neu £1000 (pa un bynnag yw'r swm lleiaf) tuag at deithiau awyr a/neu lety yn unig. Byddwch chi'n gyfrifol am yr holl gostau eraill, gan gynnwys trosglwyddiadau, Visa/ESTA, bwyd ac adloniant. Gall ail gynrychiolydd o'r un sefydliad hefyd wneud cais i fynychu a chael hyd at 25% neu £500 (pa un bynnag yw'r swm lleiaf) tuag at deithiau awyr a/neu lety yn unig. Byddwch chi'n gyfrifol am yr holl gostau, gan gynnwys trosglwyddiadau, Visa/ESTA, bwyd ac adloniant.
Sylwch fod proses ymgeisio gystadleuol ar gyfer y grant a bod gwerth ariannol y cymorth hwn yn cael ei gategoreiddio fel cymhorthdal Cymorth Ariannol Lleiaf (MFA) o dan y Ddeddf Rheoli Cymorthdaliadau (2022). Os yw eich cais i ymuno â chynrychiolwyr y gynhadledd yn y cnawd yn llwyddiannus, bydd gofyn i chi lenwi ffurflen ddatganiad sy'n nodi cyfanswm gwerth y cymorth gwladwriaethol a dderbyniwyd yn ystod y 3 blynedd diwethaf.
I gael rhagor o wybodaeth am ILP ewch i'r wefan Rhaglen Cyswllt Diwydiannol ILP | MIT neu cysylltwch â ni yn Welshgovernmentilpmit@gov.wales