O ymweliadau arswydus â Charchar Rhuthun, i ddraig gopr 20 troedfedd o faint yn Rhaeadr Gwy, i flychau ystlumod yn y Rhondda, mae digonedd o hwyl ar gael dros hanner tymor mis Hydref wrth i Ŵyl Amgueddfeydd Cymru gychwyn am y ddeuddegfed flwyddyn.
Mae'r dathliad wythnos o hyd yn dechrau ddydd Sadwrn [dydd Sadwrn 24 Hydref tan ddydd Sul 1 Tachwedd], ac mae ystod eang o ddigwyddiadau, arddangosfeydd a gweithgareddau yn cael eu cynnal mewn mwy na 60 o amgueddfeydd ac orielau ledled y wlad.
Caiff yr ŵyl ei threfnu gan Ffederasiwn Amgueddfeydd Cymru a'i chefnogi gan gyllid Llywodraeth Cymru, ac mae'n cynnig llawer o ddigwyddiadau a gweithgareddau arbennig rhad neu ddi-dâl i deuluoedd. Felly dyma'r amser perffaith i ddarganfod eich amgueddfa neu'ch oriel leol. Wrth i ddathliad eleni gofleidio Calan Gaeaf, mae amrywiaeth o weithgareddau dwyieithog ar gael gan gynnwys fersiwn wyrddach o adnodd Calan Gaeaf yr ŵyl sy'n rhad ac am ddim.
Eleni, mae trefnwyr yr Ŵyl yn annog yr amgueddfeydd sy'n cymryd rhan i ddatblygu mwy o Hwyl Gynaliadwy, gan gadw Calan Gaeaf mewn cof o hyd. Y nod yw creu hwyl gan leihau gwastraff, drwy annog amgueddfeydd ac ymwelwyr fel ei gilydd i ddathlu gan roi sylw arbennig i'r amgylchedd.
Fel rhan o'r cyllid a roddwyd i gefnogi'r ŵyl eleni, mae Ffederasiwn Amgueddfeydd Cymru wedi dyfarnu grantiau o fwy na £12,000 i 18 o amgueddfeydd i'w helpu i gymryd rhan yn yr ŵyl yn 2026.
I gael mwy o wybodaeth, cliciwch ar y ddolen ganlynol: Tymor y bwganod a ffocws ar hwyl sy'n fwy ecogyfeillgar yng Ngŵyl Amgueddfeydd Cymru 2026 | LLYW.CYMRU.