Mae pobl ledled Cymru yn cael eu gwahodd i ddweud eu dweud ar gynigion ar gyfer cwmni ynni cyhoeddus newydd sy’n eiddo i bobl Cymru.
Mae ymgynghoriad a lansiwyd heddiw yn amlinellu cynigion ar gyfer un cwmni ynni cyhoeddus cenedlaethol. Byddai’r cwmni’n dod â sefydliadau ynni presennol ynghyd ac yn helpu i sicrhau bod mwy o’r manteision economaidd o adnoddau ynni Cymru yn llifo i bobl, cymunedau, busnesau a gwasanaethau cyhoeddus yng Nghymru.
Mae gan Gymru rai o’r adnoddau ynni adnewyddadwy gorau yn Ewrop. Byddai’r cwmni arfaethedig yn anelu at gynyddu perchnogaeth Gymreig o brosiectau ynni a helpu cymunedau, busnesau a gwasanaethau cyhoeddus i wneud gwell defnydd o ynni a gynhyrchir yng Nghymru.
Ni fyddai’r cwmni yn disodli cyflenwyr ynni presennol nac yn gosod prisiau ynni cartrefi yn uniongyrchol. Fodd bynnag, gallai cynyddu perchnogaeth Gymreig o brosiectau ynni helpu i leihau costau ynni dros amser a sicrhau bod mwy o arian yn cael ei ailfuddsoddi yng nghymunedau a gwasanaethau cyhoeddus Cymru.
Mae’r ymgynghoriad ar agor tan 30 Tachwedd 2026.
Gall pobl gymryd rhan ar-lein yn: Creu cwmni ynni cyhoeddus cyfunol i Gymru | LLYW.CYMRU
I ddarllen y datganiad llawn dewisiwch y ddolen ganlynol: Llunio cynlluniau ar gyfer cwmni ynni glân newydd, sy’n eiddo i Gymru, er budd Cymru | LLYW.CYMRU