Mae Llywodraeth Cymru yn darparu £31.5 miliwn ychwanegol i awdurdodau lleol i gyflawni prosiectau adfywio a fydd yn trawsnewid canol trefi ledled Cymru.
Bydd y cyllid yn cael ei ddefnyddio gan naw awdurdod lleol i helpu i gyflawni prosiectau fel Y Storfa yn Abertawe, Marchnad y Frenhines yn y Rhyl a dymchwel Canolfan Hamdden Casnewydd.
Cadarnhawyd y cyllid ychwanegol hwn gan Lywodraeth Cymru ar ddiwedd y flwyddyn ariannol ddiwethaf, gan ddod â chyfanswm y buddsoddiad ar gyfer 2024/25 i £70 miliwn trawiadol.
Mae canol ein trefi a'n dinasoedd yn dod â phobl ynghyd, yn cynnal economïau lleol, ac yn sail i ymdeimlad cymunedau o falchder, treftadaeth a pherthyn. Mae Rhaglen Trawsnewid Trefi Llywodraeth Cymru yn helpu i adfywio a rhoi bywyd newydd i'r mannau hyn.
Ers ei lansio yn 2020, mae'r rhaglen wedi dyfarnu dros £314 miliwn mewn cyllid grant a benthyciadau i gefnogi gwaith adfywio ledled Cymru. Mae pob un o'r 22 awdurdod lleol yn derbyn cyllid gan y rhaglen Trawsnewid Trefi.
Mae Llywodraeth Cymru wedi gwarchod cyllidebau ar gyfer y Rhaglen Trawsnewid Trefi, gyda £40 miliwn ar gael ar gyfer 2025/26.
I gael rhagor o wybodaeth, dewiswch y ddolen ganlynol: Hwb o £31.5 miliwn i drefi a dinasoedd Cymru | LLYW.CYMRU