Ydy defnyddwyr yn gallu defnyddio eich gwefan e-fasnach yn rhwydd?
Os ydych yn defnyddio eich gwefan eich hun neu’n gwerthu eich cynnyrch a’ch gwasanaethau drwy blatfform arbenigol, yr hyn sy’n bwysig am unrhyw wefan e-fasnach lwyddiannus yw pa mor hawdd y gellir ei defnyddio.
Dylai’r cwsmer allu ei defnyddio’n rhwydd a dylai pob dolen, botwm a dull talu fod yn gweithio’n ddiffwdan. Gallai unrhyw beth sy’n peri trafferth i’ch cwsmeriaid eu hannog i fynd i wefan arall neu benderfynu peidio prynu.
Mae gwefan symudol yn hanfodol!
Dylai eich gwefan fod yn fwy hwylus ar gyfer dyfeisiau symudol. Mae mwy o ymchwilwyr yn chwilio am gynnyrch a gwasanaethau ar-lein cyn prynu, felly mae’n hollbwysig bod eich gwefan yn gweithio’n llawn ar ba bynnag ddyfais sydd gan eich defnyddiwr.
Crëwch brofiad sy’n rhoi’r defnyddiwr yn gyntaf.
O ran sut i osod, trefnu a dylunio eich gwefan e-fasnach, y cwsmer sy’n bwysig bob amser! Dylai eich gwefan ganolbwyntio ar anghenion y cwsmer. Ewch ati drwy feddwl am beth allech ei wella i wneud eu profiad o brynu yn symlach ac yn fwy pleserus.
Mae lluniau o’r radd flaenaf a chynnwys diddorol yn hanfodol.
Gwnewch yn siŵr eich bod yn hyrwyddo eich cynnyrch a’ch gwasanaethau yn dda. Nid yw delweddau diflas a gwael, na chynnwys difflach sydd ag ôl brys, yn debygol o annog pobl i brynu gennych. Dylai eich lluniau fod yn glir, yn onest ac yn ddiddorol, a dylai’r cynnwys fod yn ddifyr ac o ddefnydd.
Byddwch yn glir ynghylch costau ac amseroedd dosbarthu.
Go brin y bydd cwsmeriaid yn fodlon os ydych yn cuddio’r costau. Gwnewch yn siŵr bod yr holl gostau’n cael eu cynnwys o’r dechrau a’ch bod yn rhoi cymaint o wybodaeth â phosibl am eu harcheb, yr amseroedd dosbarthu disgwyliedig, y dewisiadau dosbarthu amrywiol ac unrhyw gostau ychwanegol.
Hyrwyddwch elfennau diogelwch
Yn yr oes ddigidol, mae diogelwch data yn hanfodol! Rhowch sicrwydd i’ch cwsmeriaid bod diogelu eu gwybodaeth ar-lein yn bwysig i chi drwy ddangos bathodynnau neu negeseuon diogelwch mewn mannau blaenllaw ar eich gwefan. Gwnewch yn siŵr eich bod yn glir ynghylch sut rydych yn defnyddio ac yn storio data.
Casglwch adborth gan gwsmeriaid a’i ddefnyddio
Mae adborth cwsmeriaid yn rhoi’r cyfle perffaith i chi wella eich gwefan e-fasnach mewn mannau penodol. Ceisiwch ddeall beth yw anghenion a disgwyliadau eich cwsmeriaid er mwyn gwneud gwelliannau.
Symleiddiwch brofiad eich prynwr
Dylai’r broses o wneud ymchwil, rhoi eitem mewn basged, rhoi manylion talu, a phrynu fod mor syml ac mor uniongyrchol â phosibl. Gall defnyddwyr ddiflasu a cholli amynedd os oes angen clicio drwy nifer o dudalennau diangen a rhoi gormod o fanylion personol.
Ewch ar ôl eitemau sydd wedi’u gadael mewn basgedi
Nid yw’r daith yn gorffen yn y fasged. Atgoffwch gwsmeriaid posibl am yr eitemau sydd yn eu basgedi o hyd a’u hannog i ddychwelyd a’u prynu.
Cofiwch gynnwys adolygiadau ar eich gwefan
Helpwch eich cwsmeriaid i fynd yn eu blaen a phrynu drwy gynnwys argymhellion ac adolygiadau cwsmeriaid ar eich gwefan. Bydd adolygiadau a sgôr gan gwsmeriaid yn gwneud y wefan yn fwy dilys yng ngolwg defnyddwyr yn y byd digidol.
