Leon Spencer

Mae perchennog busnes 25 oed o Rasa, Glynebwy, yn gosod esiampl i’w gyd-gyflogwyr, ar ôl datblygu busnes sy’n helpu pobl ag anhwylderau ac amhariadau iechyd meddwl i feithrin eu sgiliau cyflogaeth a chael profiad gwaith. 

Lansiodd Leon Spencer LTS Cleaning and Maintenance Solutions ym mis Hydref 2023 gyda chymorth Syniadau Mawr Cymru yn dilyn blynyddoedd o straffaglu i gadw swydd mewn amgylchedd gwaith traddodiadol am fod ganddo awtistiaeth gweithredu lefel uchel.

Profiad Leon, a oedd wedi arbrofi â nifer o yrfaoedd dros y naw mlynedd diwethaf, oedd nad oedd gan lawer o gyflogwyr yr addysg angenrheidiol i roi mesurau ar waith i gynorthwyo pobl fel fe mewn gweithle traddodiadol, a byddai’n aml yn cael ei orfodi i sefyllfaoedd cymdeithasol dwys a oedd yn achosi gorbryder mawr iddo. Am nad oedd yn teimlo ei fod yn cael ei glywed yn y gweithle, penderfynodd sefydlu busnes a fyddai’n ei gynorthwyo â’i anghenion ei hun o ran cyflogaeth. 

Cwmni aml-wasanaeth yw LTS Cleaning and Maintenance Solutions wrth galon Bwrdeistref Sirol Blaenau Gwent. Mae’n darparu pob math o wasanaethau ar gyfer busnesau a phobl leol yn yr ardal, o adfer llwybrau, trwsio ffensys a siediau, a glanhau gwteri i gynnal a chadw lawntiau a gwasanaethau garddio.

Ers lansio’r busnes, mae Leon wedi helpu tri o bobl eraill ag anhwylderau iechyd meddwl i feithrin sgiliau trosglwyddadwy gwerthfawr, ynghyd â hunanhyder hanfodol, trwy gynnig profiad gwaith a chyfleoedd gwirfoddoli iddynt yn LTS.

Trwy siarad wyneb yn wyneb â’r unigolion sy’n cael eu cyfeirio ato gan ysgolion, colegau ac elusennau fesul un, mae Leon yn dod i ddeall eu hanghenion penodol cyn rhoi cyfle iddynt ennill sgiliau a magu eu hyder er mwyn diogelu cyflogaeth yn y dyfodol.

Dywedodd Leon: “Doedd y boi cyntaf a wirfoddolodd gyda ni ddim yn gallu cynnal sgwrs nac edrych i fyw fy llygaid. Erbyn iddo gwblhau ei rôl wirfoddol sawl mis wedyn, roedd e’n cyfathrebu’n hyderus â chwsmeriaid ac roedd e wedi datblygu cymaint o falchder yn ei waith, roedd e’n berson hollol wahanol. Nawr mae ganddo waith parhaol fel gweithiwr tirlunio.

“Roedd gwirfoddolwr arall ag awtistiaeth gweithredu lefel uchel am fod yn brif gogydd, ond roedd ei batrwm cwsg yn erchyll ac yn amharu ar ei awydd i weithio a’i iechyd meddwl. Gwirfoddolodd yn LTS ochr yn ochr â’i swydd mewn cegin, ac o dipyn i beth datblygodd drefn rheoli amser llwyddiannus, a pherthynas iach â chwsg. Nawr fe yw’r trydydd wrth y llyw mewn bwyty llwyddiannus.”

Fel cyflogwr, nod Leon yw rhoi ymdeimlad o falchder, parch, hunan-fri a phwrpas i bobl.  Mae’r nodweddion hyn yn eu galluogi nhw i feithrin gwell perthynas â’u hiechyd meddwl a llewyrchu mewn unrhyw weithle.

Ychwanegodd Leon: “Ar ôl gweithio dros gyflogwyr oedd naill ai heb unrhyw ddealltwriaeth am ofynion anabledd neu nad oeddent wedi rhoi unrhyw fentrau ar waith i helpu pobl fel fi i lwyddo, rwy’n deall pa mor bwysig yw fy ngwaith. Rwy’n berson gwahanol ers lansio LTS. Rwy’n gweithio’n annibynnol yn fy mhwysau fy hun, mae fy niwrnod yn dod i ben pan rydw i wedi cwblhau darn o waith i safon rwy’n fodlon arni, rwy’n gorffen pob dydd wedi â boddhad yn fy ngwaith, sy’n dro ar fyd o ran fy llesiant meddwl ac awtistiaeth. Rwy’n llawn cyffro, yn lle pryder, am beth a ddaw yfory. Fy unig nod nawr yw helpu rhagor o bobl fel fi i ddod o hyd i waith neu yrfa sy’n eu siwtio nhw.”

Cafodd Leon anogaeth i gysylltu â Syniadau Mawr Cymru gan ei rieni, sydd wedi bod yn berchnogion eu busnes eu hunain ac yn ei redeg ers dros 17 mlynedd. Gwasanaeth sy’n cael ei ariannu gan Llywodraeth Cymru yw Syniadau Mawr Cymru, ac fel rhan o Busnes Cymru, ei nod yw cynorthwyo unrhyw un rhwng pump a 25 oed, gan gynnwys myfyrwyr a graddedigion, i ddatblygu syniad busnes yn rhan o’i ymrwymiad i’r Gwarant i Bobl Ifanc.

Yn fuan ar ôl cysylltu â nhw ym mis Gorffennaf 2023, cafodd Leon ei baru â Chynghorydd Busnes Syniadau Mawr Cymru, Amanda Bordessa, a roddodd gymorth iddo ddatblygu cynllun busnes, gan gyflawni gwaith ymchwil i’w gystadleuwyr, clustnodi cleientiaid lleol posibl, a phennu ei brisiau a’i gostau. 

Ym mis Medi 2023, cynorthwyodd Amanda Leon i ymgeisio’n llwyddiannus am Grant Dechrau Busnes i Bobl Ifanc. Defnyddiodd Leon y £2,000 o gynyddu ei waith marchnata, a’i gynorthwyodd i gaffael cwsmeriaid y tu hwnt i Rasa. 

Bydd Leon yn defnyddio gweddill y cyllid i drwsio hen offer a gosod dosbarthwyr dŵr ecogyfeillgar yn faniau’r cwmni, a fydd yn lleihau’r angen am iddo adlenwi rhwng gwahanol dasgau, ac yn lleihau allyriannau carbon y cwmni.

Dywedodd Ymgynghorydd Syniadau Mawr Cymru, Amanda Bordessa: “Mae Leon wedi treulio bron i ddegawd yn ceisio’i newid ei hun i gyd-fynd â mowld traddodiadol cyflogaeth. Mae LTS Cleaning and Maintenance yn fwy na dim ond awydd i ddechrau busnes, mae e am ganfod pwrpas, helpu pobl eraill a gosod cynsail i gyflogwyr eraill. Nid rhedeg busnes yn unig mae Leon, mae’n newid bywydau trwy gynnig cyfleoedd gwaith ystyrlon.”