Jack Cain

Pan sylwodd Jack Cain fod yna fwlch yn y farchnad yn ardal Bangor, sydd bennaf yn Gymraeg ei hiaith, sefydlodd Cain Auto Detailing, i gynnig gwasanaeth symudol dwyieithog ar hyd a lled y rhanbarth. 

Mae Jack wastad wedi bod â’i fryd ar fod yn entrepreneur a, diolch i gymorth busnes gan Syniadau Mawr Cymru, mae’r siaradwr Cymraeg iaith gyntaf wedi sylwi fod llawer o’i fusnes yn digwydd drwy gyfrwng ei famiaith. 

“Mae’r Gymraeg yn cael ei siarad yn helaeth ym Mangor, ac mae cleientiaid yn falch o sgwrsio yn y Gymraeg,” meddai Jack. “Roedd yn naturiol i fi ddechrau busnes yn y Gymraeg, i gynnig yr hyn mae cwsmeriaid ei eisiau a’r hyn y maent fwyaf cyfforddus ag ef.” 

Cyfeiriwyd Jack at Busnes Cymru gan Llwyddo’n Lleol 2050, cynllun yn cynnig arweiniad cyflogaeth, a atgyfnerthodd y sgiliau gwasanaethu cwsmeriaid a fagodd yn ystod ei gyflogaeth lawn amser yng Nghyngor Gwynedd.  

“Mae’n well gan lawer o fy nghleientiaid sgwrsio a gwneud trefniadau yn y Gymraeg, sy’n iawn gen i,” meddai Jack, sydd ar gael i lanhau gyda’r nosau neu ar benwythnosau. Bydd yn postio diweddariadau ynghylch ei argaeledd yn rheolaidd ar ei gyfrif cyfryngau cymdeithasol prysur. “Gall cynnig gwasanaeth dwyieithog wneud i gwsmeriaid deimlo’n gyfforddus ac mae’n meithrin ymddiriedaeth.” 

Dywedodd: “Wrth dyfu i fyny, roeddwn wastad yn golchi car fy rhieni, ac wrth fy modd yn cael y car yn lân. Penderfynais droi’r diddordeb hwnnw yn fusnes bach, ac rwyf wedi gweithio ar 40 o gerbydau ers cychwyn ym mis Ionawr.” 

Mae Jack, sy’n ugain oed, wedi bod yn gweithio gyda Chynghorydd Busnes Dechrau Busnes Pobl Ifanc, Caryl George, i fireinio ei gynlluniau ariannol. Cafodd gefnogaeth Caryl drwy’r broses ymgeisio am Grant Dechrau Busnes Pobl Ifanc a chafodd arweiniad ganddi ar hysbysebu Cain Auto Detailing fel busnes newydd cynaliadwy.  

Fe’i harweiniodd hefyd drwy sut i sicrhau’r yswiriannau busnes perthnasol a chofrestru gyda CThEF.  

Dywedodd Caryl George: “Mae Jack yn llawn bywyd ac mae wedi creu presenoldeb bywiog ar y cyfryngau cymdeithasol. Mae ganddo eisoes sylfaen ddilynwyr ffyddlon i’w waith glanhau, ac rydym yn dymuno’r gorau iddo wrth i’r busnes dyfu ac ehangu i ardaloedd daearyddol eraill.” 

Mae Jack yn gweithio o’i gar ei hun, gan ddefnyddio cynnyrch cynaliadwy os yn bosib ac yn lleihau gwastraff gymaint â phosib. “Helpodd cymorth Syniadau Mawr Cymru fi i fuddsoddi mewn chwipolchwr, hwfer, stemiwr ac offer glanhau eraill,” dywedodd. “Gall y rhain fod yn gostus, ond maent yn fy helpu i lanhau yn gynt. Fe wnaethant fy helpu i wthio fy hun y tu hwnt i fy nghylch cysur, a mynd amdani. Byddwn wrth fy modd yn gwneud hyn yn llawn amser yn y pen draw.” 

Bwriad Jack yw hyrwyddo glanhau dros dymor y gaeaf er mwyn gwrthsefyll yr effaith a gaiff y tywydd oer a rhewllyd ar gorff y cerbyd. Bydd yn talu sylw arbennig i olchwr sgrin a gwirio teiars.