Gwilym Morgan

Mae entrepreneur ar-ôl-ysgol o Gaerdydd yn ehangu ei fusnes deunydd ysgrifennu ategol gyda chefnogaeth Syniadau Mawr Cymru, fisoedd yn unig ar ôl derbyn gwobr iaith Gymraeg nodedig.

Mae Gwilym Morgan, 17 oed, o Sain Ffagan, sydd ym mlwyddyn 13 yn Ysgol Uwchradd yr Eglwys yng Nghymru Esgob Llandaf, wedi bod yn dylunio a gwerthu llyfrau nodiadau a dyddiaduron pryderon dwyieithog wedi'u hysbrydoli gan deithio ar ei is-safle Amazon, GM Notebooks, ers 2021.

Doedd Gwilym, sy'n gobeithio astudio Cymraeg a Ffrangeg ym Mhrifysgol Caerdydd y flwyddyn nesaf, erioed wedi breuddwydio am fod yn entrepreneur rhan-amser yn 15 oed. Wnaeth o ddim mentro creu ei ddyddiadur pryderon cyntaf tan i'w chwaer iau ddechrau cael problem gyda phryder. 

Meddai Gwilym: "Roedd fy mam wedi clywed ar-lein am fanteision cadw dyddlyfr a bu’n chwilio am un i'm chwaer, ond roedd yr holl ddyddiaduron pryderon yr oedd hi wedi eu gweld yn ddrud iawn, felly fe wnes i roi cynnig arni fy hun. Gan ddefnyddio Canva, fe wnes i deilwra’r dyddiadur pryderon yn arbennig ar gyfer fy chwaer iau a'i lenwi ag adrannau a oedd o fudd iddi, gan gynnwys bylchau i gofnodi ei phryderon wythnosol, ei meddyliau dyddiol a'i nodau tymor hir. 

"Fe wnaeth y dyddiadur pryderon wir helpu fy chwaer i reoli ei phryder a rhoddodd hyn y syniad i mi i ddechrau eu gwerthu ar Amazon." 

Yn ddiweddarach y mis hwn, bydd Gwilym yn rhyddhau dyddiadur pryderon Cymraeg – y cyntaf o'i fath, yn y gobaith y bydd mwy o siaradwyr Cymraeg yn teimlo eu bod yn cael eu cefnogi i ymarfer llesiant meddyliol ac ymwybyddiaeth ofalgar yn yr iaith sydd fwyaf cyfforddus iddynt.

Daw symudiad busnes mentrus Gwilym fisoedd yn unig ar ôl iddo dderbyn Gwobr Dysgwr Cymraeg Eisteddfod yr Urdd, i gydnabod ei angerdd i ddysgu Cymraeg fel ail iaith a'i ddefnydd naturiol ohoni o ddydd i ddydd.

Wrth siarad am pam ei bod yn bwysig ychwanegu mwy o Gymraeg at ei fusnes, dywedodd Gwilym: "Rwy'n synnu nad oes mwy o ddyddiaduron pryderon a deunydd ysgrifennu yn gyffredinol ar gael yn y Gymraeg. Rwy'n eiriolwr enfawr dros gefnogi pobl sydd eisiau defnyddio neu ymarfer eu Cymraeg ym mhob agwedd ar eu bywyd." 

Mae busnes Gwilym yn cyd-fynd â strategaeth Cymraeg 2050 Llywodraeth Cymru, sy'n nodi gweledigaeth i weld nifer y bobl sy'n gallu mwynhau siarad a defnyddio'r Gymraeg yn cyrraedd miliwn erbyn 2050. 

Ochr yn ochr â dyddiaduron pryderon, mae Gwilym hefyd yn gwerthu ei lyfrau nodiadau wedi'u hysbrydoli gan ei deithiau ei hun, wedi'u gorchuddio â ffotograffau a dynnwyd ar y teithiau hynny ac sydd wedi creu diddordeb ymysg prynwyr o gyn belled â'r Eidal ac America.

Lansiodd Gwilym Llyfrau Nodiadau GM gyda chefnogaeth Syniadau Mawr Cymru, gwasanaeth a ariennir gan Lywodraeth Cymru sy'n ceisio cefnogi unrhyw un rhwng 5 a 25 oed i ddatblygu syniad busnes, gan gynnwys myfyrwyr a graddedigion, fel rhan o'i ymrwymiad i’r Warant i Bobl Ifanc.

Daeth Gwilym ar draws y gwasanaeth ym mis Hydref 2022, wrth fynychu diwrnod gyrfa a gynhaliwyd yn ei ysgol. Ar ôl mynd at stondin Syniadau Mawr Cymru a sôn am ei fusnes, cafodd Gwilym ei roi mewn cysylltiad â'r Cynghorydd Busnes, Jason McLoughlin, i gefnogi cynnal a datblygu ei fusnes.

O ddatblygu cynllun busnes i drafod syniadau ar gyfer dyluniad ac archwilio'r cyfle i stocio mewn siopau annibynnol lleol, mae Jason wedi bod wrth law i gefnogi Gwilym gyda phob cam o'i daith fusnes hyd yn hyn.

Meddai Gwilym: "Wnes i erioed fynd ati i fod yn entrepreneur. Dechreuodd Llyfrau Nodiadau GM fel ffordd o gynilo arian a chefnogi fy chwaer, ac yn fuan iawn, daeth yn brosiect hwyliog ar ôl ysgol sydd â'r grym i annog mwy o siaradwyr Cymraeg i ddefnyddio eu Cymraeg. Mae Jason a Syniadau Mawr Cymru wedi bod yn system gefnogaeth wych ac maent bob amser yno i'm helpu i ddatblygu fy syniadau. Maen nhw wedi gwneud rheoli ysgol a rhedeg busnes gymaint yn haws."

Ochr yn ochr â rhyddhau mwy o lyfrau nodiadau dwyieithog a dyddiaduron pryderon ar-lein, mae Gwilym wrthi'n trafod gyda siopau annibynnol ledled Caerdydd i ddechrau stocio ei lyfrau nodiadau. 

Ychwanegodd Jason, Cynghorydd Busnes Gwilym: "Mae'n wych gweld myfyrwyr fel Gwilym yn adeiladu eu busnesau eu hunain, er budd y rhai o'u cwmpas. Gall fod yn straen rhedeg busnes ochr yn ochr â chwblhau eich Lefel A, ond dyna pam rydyn ni yma. I gefnogi unrhyw un, waeth beth fo'u hoedran neu amgylchiadau, i adeiladu busnes ffyniannus o'u hegin syniad."