Erin Burgess

Mae dynes ifanc o Brestatyn, y mae ei brwdfrydedd tuag at datŵio wedi bod yn help iddi oresgyn trafferthion yn ei bywyd personol, wedi sefydlu stiwdio ffyniannus gyda help Syniadau Mawr Cymru.  

Sefydlodd Erin Burgess ei stiwdio datŵs bersonol, ‘Tattoos by Erin Sapphire’ ym mis Hydref 2024 ym Mostyn, gogledd Cymru, gan gynnig dyluniadau tatŵs unigryw a phersonol.  

Dechreuodd taith gwneud tatŵs Erin pan oedd hi’n brentis yn stiwdio North Wales Ink ym Mhrestatyn ac er gwaethaf yr heriau a ddaeth i’w rhan, roedd tatŵio yn rhoi cyfle unigryw i gysylltu â chleientiaid mewn sefyllfa un-i-un. Dros amser, mae Erin yn gweld bod y rhyngweithiadau hyn wedi’i helpu i fagu ei hyder.  

Dywedodd Erin: “Dw i wastad wedi cael trafferth mawr bod yn llefydd swnllyd neu fod o amgylch llawer o bobl ar yr un pryd, felly roeddwn i’n gwybod fy mod am ddilyn rhywbeth a fyddai’n creu amgylchedd cyfforddus imi. Mae tatŵio wedi fy helpu i fagu hyder a chysylltu ag eraill mewn ffordd nad oeddwn i erioed yn gwybod ei fod yn bosibl. Roedd dechrau busnes yn rhywbeth roeddwn i eisiau ei gyflawni erioed ond ar ôl siarad â chleientiaid rheolaidd, penderfynais fynd amdani go iawn.”  

Ym mis Mai 2024, cymerodd Erin ran mewn gweithdy “Arweiniad ar Hunangyflogaeth” yn y dref gyfagos, Rhyl, ac yma fe gafodd gyngor ar sut i ddechrau a rheoli ei busnes ei hun. Drwy'r gweithdy, cafodd ei chyflwyno i’r mentor a’r Cynghorydd Busnes Syniadau Mawr Cymru, Peter Donovan, a gofrestrodd Erin yn y fan a’r lle.  

Dywedodd Erin: “Mae Peter wedi bod yn help mawr wrth feddwl am syniadau marchnata ac mae bob amser yn anfon adnoddau newydd ata i er mwyn fy helpu i dyfu fy musnes. Mae wedi bod yn ymarferol iawn ac mae’n holi yn rheolaidd sut hwyl mae'r busnes yn ei gael. Mae ei gymorth wedi bod yn hollbwysig wrth lywio rheolau a rheoliadau rhedeg stiwdio datŵs."  

Rhoddodd Peter gymorth i Erin ag ariannu drwy ei helpu i lenwi cais ar gyfer y grant dechrau busnes i Bobl Ifanc. Llwyddodd i ennill y grant ac fe'i defnyddiodd i’w helpu i sefydlu ei busnes drwy brynu stoc, ei gwely gwneud tatŵs a silffoedd.  

Mae Erin hefyd yn ceisio prynu mor gynaliadwy â phosibl, gan anelu at brynu cynhyrchion un defnydd, fel menig a nodwyddau, sy’n fioddiraddadwy a chyfeillgar i’r amgylchedd. Mae hefyd wedi ymrwymo i’r Addewid Twf Gwyrdd a Chydraddoldeb ac mae wedi ymroddi i redeg busnes sy’n gyfrifol yn gymdeithasol. 

Nod Erin yn y dyfodol agos yw meithrin sylfaen ddilynwyr ffyddlon a thyfu ei chronfa gleientiaid dros y flwyddyn nesaf ac, yn y pen draw, hoffai ehangu ei stiwdio drwy gyflogi mwy o artistiaid.  

Meddai: “Un o’r pethau dw i’n eu mwynhau fwyaf am redeg fy musnes fy hun yw’r rhyddid mae’n ei roi imi. Gallaf ddewis fy oriau a gweithio ar fy mhwys fy hun, a dw i’n cael creu rhywbeth i fi fy hun y gallaf ei wylio’n tyfu ac yn ffynnu.”  

Dywedodd Cynghorydd Busnes Syniadau Mawr Cymru, Peter Donovan: “Mae Erin yn benderfynol o lwyddo ac yn cynnig profiad personol i bob cwsmer sy’n ymweld â’i stiwdio. Does dim byd tebyg yn yr ardal gyfagos. Dw i o’r farn bod ganddi bopeth yn ei le i dyfu ei busnes a dw i’n gyffrous i’w weld yn datblygu wrth inni barhau i weithio gyda’n gilydd.”