Claire Hennessy

A hithau ond yn 23 oed, mae’r artist tatŵ cymwys sydd wedi’i lleoli yn Aberystwyth, Claire Hennessy, wedi trawsnewid cyfnod anodd yn ei bywyd yn fusnes wedi’i wreiddio mewn creadigrwydd, grymusedd, ac ymwybyddiaeth o iechyd meddwl, diolch i gymorth gan Syniadau Mawr Cymru. 

Ym mis Mawrth 2025, agorodd Claire Stiwdio Tatŵ Inky Pinky gyda’i phartner busnes Paul Harwood, gan gynnig gwasanaethau tyllu’r corff a thatŵio proffesiynol mewn man croesawgar a chynhwysol. 

Wedi graddio mewn Celfyddyd Gain a’i hyfforddi fel artist tatŵ, cafodd taith Claire tuag at entrepreneuriaeth ei harwain gan ei hangerdd tuag at gelf y corff a gwytnwch yn sgil profiad personol. Pan sylwodd na allai barhau â’i phrentisiaeth oherwydd yr effaith feddyliol a chorfforol o gymudo pellter hir, wynebodd Claire gyfnod o ansicrwydd, yn llywio diweithdra a’r pwysau emosiynol a ddaw gyda llwybr aneglur ymlaen. 

Gydag anogaeth ei dyweddi Geraint Evans a’i therapydd, gwnaeth y penderfyniad dewr i gymryd rheolaeth o’i dyfodol, un a fyddai’n caniatáu iddi barhau â thatŵio mewn modd sy’n cyd-fynd â’i gwerthoedd.  

Wrth siarad am ei thaith i ddod yn entrepreneur, dywedodd Claire: “Cafodd gweithio yn y Trallwng a chymudo’n ôl ac ymlaen i Aberystwyth effaith ddychrynllyd ar fy iechyd meddwl, ond doeddwn i ddim eisiau rhoi’r gorau i’r hyn yr ydw i wrth fy modd yn ei wneud. Felly, penderfynais greu rhywbeth fy hun, rhywbeth gwell. Roeddwn hefyd eisiau tynnu’r ffocws oddi ar y ffaith bod tatŵs yn waith yr artist yn unig. I fi, mae’n ymwneud â sut mae pobl yn teimlo yn eu croen eu hunain.” 

Mae’r stiwdio yn ddelfrydol ar gyfer cleientiaid niwrowahanol a’r rhai sydd â gorbryder. Er mwyn helpu i greu awyrgylch lleddfol, mae Claire a Paul wedi gosod tanc pysgod yn yr ardal aros i annog naws ddi-gynnwrf a llonydd o’r eiliad y bydd y cleient yn cerdded i mewn.  

Cyflwynwyd Claire i Syniadau Mawr Cymru gan Ganolfan Byd Gwaith Aberystwyth. Gwasanaeth wedi’i ariannu gan Lywodraeth Cymru yw Syniadau Mawr Cymru sydd, fel rhan o Busnes Cymru, â’r nod o roi cymorth i rai dan 25 oed i ddatblygu syniad busnes, fel rhan o’i hymrwymiad i’r Warant i Bobl Ifanc.  

Cafodd Claire ei chysylltu â’r Cynghorydd Busnes Rhianydd Webb a helpodd hi i geisio adnoddau i fagu sgiliau, yn cynnwys gweminar Dechrau Busnes lle magodd yr hyder i fynd ymlaen i’r camau nesaf. 

Parhaodd Claire: “Fyddai hyn ddim wedi bod yn bosibl heb Syniadau Mawr Cymru. O’r dechrau un, byddwn i’n troi at Rhianydd am bopeth a byddai’n ateb bob cwestiwn yr oeddwn i’n ofyn iddi. Roedd ei harweiniad yn hollbwysig yng nghamau cynnar fy musnes - helpodd fi i drawsnewid pethau o fod yn ddi-waith ac yn ansicr, i redeg fy stiwdio fy hun a chael gwneud y gwaith sydd mor bwysig i mi bob dydd.” 

Bellach yn meddiannu lle sydd wedi’i ail-wampio ar y stryd fawr wrth galon Aberystwyth a chyda sylfaen gleientiaid ffyddlon sy’n tyfu, mae gan Claire gynlluniau syml ar gyfer y flwyddyn sydd i ddod: parhau i wneud pobl yn hapus drwy wneud rhywbeth sydd mor agos at ei chalon. Mae hi’n falch o arddangos Addewid Twf Gwyrdd a Chydraddoldeb Busnes Cymru ar ddrws y stiwdio.   

Dywedodd y Cynghorydd Busnes, Rhianydd Webb: “Mae brwdfrydedd, gwytnwch a natur benderfynol Claire wedi bod yn anhygoel. O’r cyfarfod cyntaf, gallwn weld pa mor agos at ei chalon ydi tatŵio, ond hefyd pa mor bwysig iddi yw creu lle y gallai pobl deimlo’n ddiogel a’u bod yn cael eu gwerthfawrogi. Mae hi’n trawsnewid cornel fach ar y stryd fawr yn rhywbeth trawiadol go iawn.”