Madeleine Sargent

Fi yw Madeleine, ac rwy’n Ddarlunydd a Dylunydd, yn ogystal â Chyfarwyddwr Creadigol fy asiantaeth – Yoke. Drwy fy ngyrfa greadigol, rydw i wedi bod yn ffodus i weithio gyda brandiau fel Howies, EE, Harper Collins, a Zipworld. Rydw i hyd yn oed wedi ennill Gwobr D&AD am ddylunio rhyngweithiol. Ochr yn ochr â’m gwaith darlunio, cydsefydlais Yoke, asiantaeth sy’n cyfuno creadigrwydd, strategaeth ac adrodd straeon ar gyfer asiantaethau a brandiau.

Fel Artist/Darlunydd llawrydd, dechreuodd hyn tra roeddwn yn dal i astudio yn y brifysgol. Roeddwn i’n benderfynol o gael comisiynau ‘go iawn’ – ac roeddwn i’n gweithio’n galed i addysgu fy hun sut i adeiladu gwefannau er mwyn i mi allu dylunio fy ngwaith fy hun i hyrwyddo fy ngwaith. Fe wnes i gysylltu â rhai o'm hoff gylchgronau a brandiau, gan ddweud wrthyn nhw fy mod i'n fyfyriwr a byddwn i wrth fy modd yn gweithio gyda nhw. Fe weithiodd! Mae pobl yn gefnogol iawn i helpu pobl ifanc gyda’u diddordebau, ac roeddwn i’n ddigon ffodus i gael fy nghomisiynau cyntaf fel hyn. Rydw i wastad wedi bod eisiau gweithio i mi fy hun, ac mae bod yn Ddarlunydd yn waith llawrydd yn fel arfer, felly roedd yn gam naturiol ymlaen i mi.

Wrth dyfu i fyny mewn cartref creadigol a chefnogol, cefais fy ysbrydoli gan fy mam, a oedd yn mwynhau’r hyblygrwydd wrth weithio iddi hi ei hun, a’m Modryb, oedd yn artist llawrydd. Mae fy ngŵr, sydd hefyd yn greadigol, wedi bod yn bartner i mi mewn amryw o brosiectau personol, oedd yn ein harwain yn naturiol i ddechrau Yoke gyda’n gilydd.

Cafodd fy arddull cyfryngau cymysg ei greu o gariad at siopau ail-law. Fel myfyriwr celf yn Hastings, treuliais oriau’n archwilio hen siopau, yn didoli drwy lewys recordiau llychlyd a hen lyfrau ffotograffiaeth.  Arweiniodd yr arbrawf hwn gyda gweadau a ffotograffau at fy mrwdfrydedd am collage, ac mae fy nghasgliad cynyddol o hen effemera yn parhau i fy ysbrydoli. I gael fy ysbrydoli bob dydd o hyd, rydw i’n blaenoriaethu ymarfer corff ac ymwybyddiaeth ofalgar. Mae ioga, cerdded mynyddoedd, a nofio dŵr oer yn helpu i fy meddwl ganolbwyntio a bod yn llawn syniadau newydd.

Mae datrys problemau yn rhan naturiol o fywyd bob dydd. Rwy’n ei weld fel rhywbeth cadarnhaol! Mae llawer o ddysgu wedi bod, a hynny’n gyson mewn gwirionedd! Dyna beth rydw i’n ei garu am yr hyn rydw i’n ei wneud, dydw i byth eisiau rhoi’r gorau i ddysgu. Dyma ychydig o bethau rydw i wedi’u dysgu – a phroblemau rydw i wedi’u goresgyn – sut i lywio drwy gontractau, negodi prisiau, datrys problemau cleientiaid yn llwyddiannus, sut i farchnata fy hun, sut i ddod o hyd i waith/cleientiaid newydd. Mae’r rhestr yn ddiddiwedd! Mae pobl greadigol yn datrys problemau’n naturiol, ac rwy’n ceisio eu cofleidio.

Hyblygrwydd! Mae’n anodd bod yn fos arnoch chi eich hun, ond mae’r manteision yn drech na’r trafferthion. Rydw i wrth fy modd yn cael pennu fy nhrefn fy hun, gan weithio sut a phryd rydw i’n gweithio orau. Hefyd, mae gen i’r opsiwn i weithio cymaint neu gyn lleied ag y mynnaf – gall y busnes dyfu gymaint ag y dymunaf ac nid oes rhaid i mi drefnu gwyliau/diwrnod i ffwrdd pan fydd y tywydd yn edrych yn dda!