Laura Teare-Jones

Mae Laura Teare-Jones yn hyfforddwr hormonau a meddylfryd sydd bellach yn fentor busnes

“Rydw i’n cynorthwyo pobl i flaenoriaethu’r pethau sydd bwysicaf iddynt. Yn ogystal â chynnig hyfforddiant un-i-un, mae gennyf ddau grŵp ar gyfer cynorthwyo pobl gyda’u llesiant a chyda’u busnes, ac rydw i’n rhedeg digwyddiad rhwydweithio a rhannu mannau gwaith yng Nghaer, sef y GET **IT DONE CLUB.”

Pan gefais fy niagnosio gydag anhwylder dysfforig cyn mislif, sylweddolais na fyddai’r model arferol ‘Dydd Llun i Ddydd Gwener 9-5’ yn gweithio i mi a’m hiechyd amherffaith.

Bu’n rhaid imi ddysgu llawer (a dad-ddysgu pethau hefyd) amdanaf fy hun a’m corff, a dechreuais bodlediad yn ystod y cyfnod clo o’r enw ‘My Hormones My Health’.

Pan gafodd fy swydd ei dileu yn 2020, penderfynais fynd yn hunangyflogedig.

Ar ôl i’m swydd gael ei dileu, rydw i’n cofio teimlo mor nerfus ynglŷn â bod yn hunangyflogedig! Doeddwn i ddim yn credu digon ynof fi fy hun, ond yr hyn a helpodd oedd fy amgylchynu fy hun gyda phobl eraill a oedd yr un fath yn union â fi, ond a oedd yn gwneud pethau anhygoel yn y byd busnes! Fe wnaeth hyn fy ysbrydoli i ddweud – os gallan nhw lwyddo, fe allaf innau lwyddo hefyd!

Hefyd, darllenais lyfr o’r enw “Be A Free-Range Human” gan Marianne Cantwell – buaswn yn ei argymell i bawb.

Y broblem fwyaf rydw i wedi’i hwynebu yw’r ffaith fy mod yn gwneud pethau’n anodd i mi fy hun, a chyfyngu ar fy llwyddiant oherwydd fy meddylfryd, a meddwl nad ydw i’n ddigon da, neu y dylwn i wneud pethau mewn rhyw ffordd neilltuol.

Rydw i wedi dysgu nad oes yn rhaid gweithio popeth allan ar y cychwyn, a bod yna ateb i bob problem, a rhywun a all eich helpu!

Oherwydd fy nghyflwr iechyd, rhaid imi ofalu na fyddaf yn gwneud gormod. Felly, y peth gorau ynglŷn â bod yn hunangyflogedig yw cael y pŵer i reoli fy nyddiadur a’m diwrnodau i ffwrdd. Os byddaf angen dechrau gweithio dipyn bach yn hwyrach ambell ddiwrnod, popeth yn iawn; ac os byddaf angen arafu pethau, mae hynny’n iawn hefyd.

Doedd dim modd imi wneud hynny pan oeddwn i’n gyflogedig, oherwydd roedd disgwyl imi gyrraedd yn yr un ffordd a pherfformio yn yr un ffordd bob diwrnod, ac nid yw hynny realistig nac yn gynaliadwy i rywun fel fi.