- Sector:
- Diwydiannau Creadigol
- Rhanbarth:
- Caerdydd
Mae Lunax Digital yn asiantaeth hysbysebu greadigol a digidol. Rydym yn creu ymgyrchoedd marchnata arwyddocaol gyda chanlyniadau effeithiol.
Cychwynnais y busnes fel ffordd o barhau i weithio gyda babi newydd. Dychwelais i’r gwaith ar ôl cyfnod mamolaeth byr, ond sylweddolais ar ôl amser byr fy mod yn cael trafferth cydbwyso popeth. I ddechrau, penderfynais gynnig rheoli cyfryngau cymdeithasol oherwydd ei hyblygrwydd a’r gallu i’w wneud o gartref gyda babi newydd, ond nawr 8 mlynedd yn ddiweddarach, rwyf wedi tyfu’r busnes i asiantaeth wasanaeth sydd wedi datblygu’n llawn.
Ers lansio fy musnes, mae tad fy merch a minnau wedi gwahanu, ac felly rwy’n fam sengl/rhianta ar y cyd. Roedd sawl her ynghlwm â hyn gan fy mod yn 100% gyfrifol am sicrhau’r incwm i fy nghartref a heb neb na dim i ddibynnu arnynt nag i weithredu fel rhwyd ddiogelwch. Gwnaeth fy hunan-hyder ddirywio a chafodd hyn effaith sylweddol ar fy musnes. Treuliais gyfnod mewn ward seiciatrig, gan dderbyn amryw o feddyginiaeth at amrywiaeth o gyflyrau iechyd meddwl, a derbyniais ddiagnosis awtistiaeth. Rwyf wedi goresgyn hyn oll a nawr yn hyderus a sefydlog gyda synnwyr newydd o fy hunan a dealltwriaeth o fy hunan, sy’n golygu fy mod wedi gwneud newidiadau i’r ffordd rwy’n rhedeg fy musnes a sut rwy’n byw fy mywyd - i gyd gyda chanlyniadau cadarnhaol.
Y peth gorau am fod yn rheolwr arnaf i fy hun yw gweld gwên fy merch pan rwy’n ei nôl o’r ysgol bob dydd. Mae’r hyblygrwydd i weithio o gwmpas anghenion fy nheulu yn rhywbeth hollol amhrisiadwy.
Mae bod yn berchen ar fusnes fy hun yn rhywbeth rwyf bob amser wedi bod ei eisiau. Yn blentyn, roeddwn yn gwerthu breichledi cyfeillgarwch a siocledi yn y maes chwarae, felly o oedran ifanc roeddwn yn gwybod mai dyma oedd y llwybr i mi, ond cyn i mi gael fy merch nid oedd gwir hwb na rheswm i mi fynd amdani. Ni chefais erioed fy ysbrydoli gan neb arall, dim ond fy angerdd fy hun a’r awydd i gyflawni.