- Sector:
- Diwydiannau Creadigol
- Rhanbarth:
- Caerdydd
Rwy’n berchen ar y brand dillad, Finley’s House. Rwy’n arbenigo mewn dylunio a chreu dillad latecs.
Sbardunodd y syniad i ddechrau busnes fy hun wrth i mi sylweddoli y gallaf gymryd nifer o agweddau bach o fy mhrofiadau bywyd, a dod â nhw i gyd ynghyd i sefydlu busnes fy hun. Rwyf bob amser wedi ffafrio llwybr creadigol dros lwybr academaidd traddodiadol. Ynghlwm â bod yn berson creadigol, mae’r teimlad mai’r unig ddewis yw ei wneud drosoch eich hun. Felly, dyna yn union wnes i!
Mae sawl peth yn fy ysbrydoli, ac rwy’n dueddol o gael fy ysbrydoli gan bobl sy’n meddu’r nodweddion o fod yn ddygn, yn frwdfrydig, ac yn wahanol i’r arfer. Rwyf hefyd yn cael fy ysbrydoli wrth wylio pobl. Mae gwylio dau berson yn cyfathrebu ar drên prysur yn fy ysbrydoli. Neu, wylio rhywun yn ceisio cario eu siopa wrth y til i osgoi prynu bag. Tybiaf fod pethau bob dydd yn fy ysbrydoli. Rwy’n hoffi meddwl am stori neu syniad i gydfynd â’r sefyllfa, ac mae hynny, gydag amser yn trosi’n syniad ar gyfer dyluniad, ac yna’n gynnyrch rwy’n ei werthu.
Trwy gydol y cyfnod o redeg fy mrand, rwyf wedi darganfod fy hun mewn sawl sefyllfa lle’r oedd rhaid i mi ddatrys pethau nad oeddwn yn gwybod sut i ddelio â nhw cyn iddynt ddigwydd. Yn ddiweddar, mae polisi newydd wedi’i gyflwyno yn yr UE, a elwir yn GSPR, sy’n atal unrhyw fusnes rhag masnachu i’r UE heb gynrychiolaeth UE. Roedd rhaid i mi wneud y penderfyniad i beidio â gwerthu yno mwyach, a dysgu mor gyflym â phosib beth oedd oblygiadau’r polisi hwn ar fy nghwmni, fel fy mod yn gallu gwerthu i’r UE unwaith eto. Fe wnes i ymdopi â hyn drwy gysylltu â busnesau eraill a chynnal gwaith ymchwil fy hun ar-lein. Trwy hyn, rwyf wedi llwyddo i ddod o hyd i gynrychiolydd, mae gen i well dealltwriaeth am werthu dramor, ac yn teimlo’n hyderus pe bai sefyllfa debyg yn codi yn y dyfodol.
Un o fy hoff bethau am fod yn fos arnaf i fy hun yw gallu rheoli fy amser fy hun. Rwyf hefyd yn mwynhau’r rhyddid creadigol mae’n ei roi i mi.