Felicity Benson-Healey

Mae Emergent Thinkers™ yn cynnig rhaglenni wedi’u teilwra i gynorthwyo unigolion a sefydliadau i greu gwerth ystyrlon trwy sgiliau entrepreneuraidd ac intrapreneuraidd, gan feithrin arloesi a thwf cynaliadwy.

Crëwyd Emergent Thinkers er mwyn pontio theori ac ymarfer, gan feithrin cymhwysedd entrepreneuraidd a chreu gwerth mewn addysg a datblygu cymunedol. Gyda phrofiad helaeth mewn gwella busnes, arwain ac addysg, sylweddolais fod angen dull a ysgogir gan werthoedd ar gyfer ymdrin ag arloesi, cynaliadwyedd a thwf.

Mae fy ngyrfa’n cwmpasu’r sector cyhoeddus a’r sector preifat, yn cynnwys arwain gwelliant parhaus, dysgu a datblygu, ac addysg entrepreneuraidd. Rydw i wedi cydweithio gydag ysgolion, prifysgolion, awdurdodau lleol, busnesau bach a chanolig, cwmnïau corfforedig a sefydliadau cymunedol, gan eu helpu i addasu, arloesi a bachu ar gyfleoedd. Mae hyd a lled fy mhrofiad yn fy ngalluogi i fynd i’r afael â heriau cymhleth – o ymwreiddio fframweithiau entrepreneuraidd mewn addysg i gynorthwyo sefydliadau i gyflawni canlyniadau cynaliadwy. Trwy gyfrwng dulliau arloesol a phrofiad bywyd, mae Emergent Thinkers yn grymuso addysgwyr, arweinwyr a dysgwyr, gan ddathlu cryfderau a meithrin newid ystyrlon a hirdymor.

Mae fy ysbrydoliaeth yn deillio o angerdd gydol oes dros ddysgu ac ymrwymiad i greu effaith gadarnhaol ar y gymdeithas. Mae gweld sut y gall syniadau entrepreneuraidd drawsnewid bywydau a chymunedau wedi fy nghymell i gyfuno arbenigedd academaidd a phrofiadau bywyd i rymuso eraill. Mae’r addysgwyr, yr arweinwyr a’r ysgogwyr newid rydw i wedi gweithio gyda nhw wedi fy ysbrydoli i barhau â’r siwrnai hon, gan feithrin gwytnwch a chreadigrwydd a chreu gwerth o bob math.

Roedd pontio o rôl strwythuredig i ymgynghoriaeth annibynnol yn heriol ac yn werth chweil ar yr un pryd. Er mwyn gallu delio ag ansicrwydd a denu cleientiaid, roedd angen dyfalbarhad, rhwydweithio a hyblygrwydd. Llwyddodd yr heriau hyn i wella fy nealltwriaeth o greu gwerth y tu hwnt i ganlyniadau ariannol, gan ganolbwyntio ar effaith gymdeithasol, amgylcheddol ac addysgol. Mae’r gwytnwch hwn bellach yn siapio fy ngallu i ysbrydoli a chefnogi eraill.

Gan fy mod yn fòs arnaf fy hun, mae gennyf ryddid i arloesi, ymateb i heriau sy’n esblygu, a chreu atebion sy’n gwella gwerth i unigolion, cymunedau a sefydliadau. Hefyd, mae’n rhoi hyblygrwydd imi gydbwyso prosiectau proffesiynol ag ymrwymiadau teuluol, yn ogystal â pharhau â’m hangerdd dros addysg a datblygu cynaliadwy.

Ardal arbenigrwydd

Datblygu meddylfryd entrepreneuraidd a chreu gwerth; Arwain a datblygu timau; Newid diwylliannol; Arloesi o ran y cwricwlwm a fframweithiau cymhwysedd (e.e. EntreComp, Cwricwlwm i Gymru); Hwyluso meddwl creadigol a beirniadol; Ymchwil, yn cynnwys Ffenomenoleg, gwerthuso ac ymgysylltu â rhanddeiliaid.