- Sector:
- Diwydiannau Creadigol
- Rhanbarth:
- Blaenau Gwent
Destiny Kirk ydw i, sylfaenydd Yellow Hat, sef cwmni rydw i’n falch o fod wedi’i sefydlu yn 2020. Mae entrepreneuriaeth yn llifo trwy fy ngwythiennau. Rydw i’n dod o deulu sy’n llawn entrepreneuriaid, ac mae adeiladu rhywbeth sy’n eiddo i mi wastad wedi bod yn nod ac yn genhadaeth.
Datblygodd Yellow Hat yn sgil fy angerdd dros helpu busnesau i lwyddo. A minnau’n meddu ar radd mewn Dylunio Hysbysebu a blynyddoedd o brofiad mewn Marchnata, rydw i wedi treulio fy ngyrfa’n helpu cwmnïau i gyflawni eu potensial trwy gyfrwng fy ngwaith strategol, a ysgogir gan ganlyniadau, lle canolbwyntir ar wella’u presenoldeb ar-lein. Mae fy siwrnai gorfforaethol wedi fy ngalluogi i arwain timau amrywiol ac ennill y sgiliau angenrheidiol i fod yn berchen ar fy musnes fy hun.
Cam beiddgar oedd rhoi Yellow Hat ar waith, ond dyna oedd y peth iawn i’w wneud. Rydw i’n mwynhau’r gwobrau a’r heriau sy’n gysylltiedig â rhedeg busnes – gwneud pob penderfyniad, llunio’i ddyfodol, ac ymfalchïo yn y ffaith ei fod yn tyfu. Y rhyddid, yr ymreolaeth a’r effaith a gaf – dyna’r pethau sy’n gwneud y siwrnai hon mor werth chweil.