Cheryl Reeves

Rydw i’n berchennog benywaidd ar fusnes fferm a leolir ym Mangor Is-coed. Yno, rydw i’n magu lloi eidion llaeth er mwyn cynhyrchu anifeiliaid eidion ar gyfer y gadwyn cyflenwi bwyd. Yn 2020, euthum ati i arallgyfeirio gweithrediadau’r fferm trwy sefydlu’r Cwmni Buddiannau Cymunedol Agri-cation, sef canolfan addysg ar y fferm ar gyfer cyflwyno addysg amaethyddol. Ochr yn ochr â’m gŵr, rydym hefyd yn rheoli busnes danfon bach sy’n dosbarthu blociau maeth anifeiliaid ledled Cymru a Lloegr. Hefyd, rydw i’n hunangyflogedig gyda TIMAC Agro, lle rydw i’n cynorthwyo i werthu blociau maeth. Mae gan yr holl fentrau hyn gysylltiad annatod â seilwaith ein fferm, gan greu gweithrediad cydlynol a chynaliadwy.

Dechreuais y busnes gan fy mod wedi sylwi ar fwlch yn y farchnad ar gyfer addysg a chymorth ar y fferm. Nod y fenter hon yw pontio’r diffyg cyswllt cymdeithasol rhwng ffyrdd gwledig a threfol o fyw, gan gynnig cyfle i bobl ddeall o ble y daw eu bwyd a pha mor bwysig yw arferion ffermio cynaliadwy. Wrth gynnig cyfleoedd addysgol trwy gyfrwng Agri-cation, rydym yn helpu i werthfawrogi mwy ar amaethyddiaeth a’i rôl yn y gadwyn cyflenwi bwyd, a hefyd rydym yn ategu’r angen am ddulliau ffermio cynaliadwy ac amgylcheddol gyfrifol.

Y peth gorau ynglŷn â bod yn feistres arnaf fy hun yw’r hyblygrwydd. Mae gennyf ryddid i roi fy syniadau ar waith a gwneud penderfyniadau busnes sy’n cyd-fynd â’m gweledigaeth a’m nodau. Mae’r ymreolaeth hon yn fy ngalluogi i roi dull mwy dynamig ac ymatebol ar waith wrth reoli’r fferm a’r mentrau cysylltiedig. Hefyd, gan fy mod yn feistres arnaf fy hun, rydw i’n cael digonedd o gyfleoedd i rwydweithio gydag unigolion o’r un meddylfryd, ac rydw i’n gallu cydweithio a rhannu gwybodaeth sy’n datblygu mwy fyth ar y busnes a’i effaith.

Un her fawr y bu’n rhaid imi ei goresgyn oedd marchnata ein cwmni gerbron unigolion figan neu lysieuol, o gofio mai prif ganolbwynt y busnes yw cynhyrchu anifeiliaid eidion. Er gwaethaf hyn, rydym wedi llwyddo i integreiddio a gweithio gyda chwech o oedolion llysieuol ac un unigolyn figan ar y fferm. Rydym wedi llwyddo i rannu gwybodaeth am gynhyrchu bwyd mewn modd addysgiadol a llawn parch, gan sicrhau nad ydym yn achosi anghysur emosiynol. Mae hyn wedi ein galluogi i greu amgylchedd cynhwysol, gan hyrwyddo dealltwriaeth a pharch tuag at wahanol ddewisiadau deietegol wrth bwysleisio pwysigrwydd arferion ffermio cynaliadwy.

Dau unigolyn a’m hysbrydolodd i gychwyn ar y siwrnai hon yw Julie Thomas ac Abi Reader. 

Fe wnaeth Julie, gwraig i ffermwr, sefydlu Simply the Best Training yn Ne Cymru, sy’n cynnig cymwysterau amaethyddol ac yn dangos yr effaith ddofn a gaiff rhaglenni hyfforddi pwrpasol. Fe wnaeth Abi Reader, ffermwr llaeth yn Ne Cymru, sefydlu COWS ON TOUR, sef cwmni amaeth-addysg sy’n addysgu plant ysgol ledled Cymru trwy gyfrwng sioeau teithiol diddorol. Llwyddodd eu hymdrechion arloesol mewn addysg amaethyddol i’m cymell i greu’r Cwmni Buddiannau Cymunedol Agri-cation, gan anelu at bontio’r bwlch rhwng cymunedau gwledig a threfol a thynnu sylw at bwysigrwydd ffermio cynaliadwy.