Ally Elouise

Menter gymdeithasol nid er elw, a sefydlais nôl yn 2015, yw CBC Prom Ally. Rydym yn rhoi benthyg ffrogiau prom a siwtiau am ddim i arddegwyr sy’n wynebu caledi ariannol. Rydym hefyd yn annog ail ddefnyddio ac ailgylchu dillad er mwyn eu cadw o’r safleoedd tirlenwi am gyn hired â phosib, trwy eu gwerthu yn ein siop ail-law yn Llandrillo-yn-Rhos.

Cychwynnais y CBC pan oeddwn yn y Brifysgol, wedi i mi glywed stori am eneth ifanc oedd yn methu fforddio ffrog i’r prom. Roedd yn edrych mewn siopau elusen lleol, ond yn methu â dod o hyd i unrhyw beth a hoffai, ac felly ddim eisiau mynd i brom yr ysgol gyda’i ffrindiau a’i chyfoedion. Roeddwn yn meddwl tybed oedd yna unrhyw beth ar gael i helpu arddegwyr yn y sefyllfa hon, a phenderfynais sefydlu Prom Ally. Cychwynnais drwy brynu pob ffrog ffurfiol y gallwn ddod o hyd iddynt mewn siopau elusen gyda fy arian pen-blwydd yn 21ain, a gofyn i ffrindiau ar Facebook os oedd ganddynt rai i’w cyfrannu. Yn wreiddiol, bwriad hyn oedd helpu fy ysgol uwchradd fy hun yn unig, ond cynyddodd yn gyflym iawn pan welais pa mor fawr oedd y galw am help. Mae CBC Prom Ally nawr ledled y DU ac rydym yn helpu arddegwyr o bob cwr gyda gwisg am ddim. 

Ein problem fwyaf, ac wedi bod bob amser, yw cyllid a lle i storio, ond rydym wedi llwyddo i wneud cais am grantiau gwahanol dros y blynyddoedd ac wedi bod yn llwyddiannus wrth ddod o hyd i unedau storio fforddiadwy. Erbyn hyn mae gennym ffrydiau incwm niferus, o gyllid grant i werthu dillad ffurfiol ail-law yn ein siop ac mewn digwyddiadau dros dro!

Rwyf wrth fy modd yn bod yn fos arnaf i fy hun oherwydd gallaf flaenoriaethu pa bynnag ran o’r busnes sydd bwysicaf yn fy marn i, a does dim rhaid i mi esbonio’r dewisiadau hynny i unrhyw un! (Er fel CBC, ac nid busnes arferol, mae gennym Fwrdd Cyfarwyddwyr, felly rwyf yn dal i orfod gwneud yn siŵr eu bod o blaid unrhyw benderfyniadau mawr!)