25.09.2026
Mae mwy na 1,200 o blant mewn ysgolion cynradd ledled Cymru yn dysgu am bwysigrwydd diogelu eu golwg a chadw'n ddiogel o amgylch peryglon posibl ar y fferm, diolch i bartneriaeth rhwng Partneriaeth Diogelwch Fferm Cymru (WFSP) a Sefydliad Cenedlaethol Brenhinol Pobl Ddall (RNIB).
Yn ystod Wythnos Genedlaethol Iechyd y Llygaid, mae WFSP ac RNIB yn tynnu sylw at werth addysgol Neis dy weld di, Bob!, sef y trydydd llyfr yn y gyfres boblogaidd o lyfrau am Bob, sy'n cyfuno negeseuon ymarferol am ddiogelwch ar y fferm gyda gwersi pwysig am amddiffyn y golwg a deall colli’r golwg.
Mae mwy na 1,200 o gopïau o'r llyfr eisoes wedi'u dosbarthu i ysgolion cynradd ledled Cymru. Er mwyn sicrhau ei fod yn hygyrch i gynifer o blant â phosibl, mae'r llyfr hefyd ar gael ar ffurf braille.
Fel rhan o weithgareddau Wythnos Genedlaethol Iechyd Llygaid, mae’r Welsh Whisperer a Bob y Ci Defaid wedi ymweld ag ysgolion ledled Cymru, yn helpu plant i ddeall pwysigrwydd gofalu am eu golwg, adnabod risgiau posibl, a chadw'n ddiogel ar ffermydd, o gwmpas peiriannau ac yng nghefn gwlad.
Mae'r llyfrau am Bob yn cael eu cyhoeddi gan Bartneriaeth Diogelwch Fferm Cymru, ac maent yn defnyddio straeon a chymeriadau difyr i annog sgyrsiau am ddiogelwch ymhlith plant, teuluoedd a chymunedau ffermio.
Meddai Siân Tandy, sy’n aelod o Bartneriaeth Diogelwch Fferm Cymru:
"Gall ffermydd gyflwyno nifer o risgiau i'n llygaid, o lwch a malurion i gemegion a pheiriannau. Trwy ddefnyddio Neis dy weld di, Bob!, gallwn ni helpu plant i ddeall pam mae amddiffyn eu golwg mor bwysig, a gallwn ni hefyd annog ymddygiad diogel ar ffermydd ac yng nghefn gwlad.
Mae gweithio ochr yn ochr â'r RNIB wedi ein galluogi i wneud y neges ddiogelwch bwysig hon yn hygyrch i hyd yn oed mwy o blant trwy argraffiadau braille ac ymweliadau ag ysgolion ledled Cymru."
Dywedodd llefarydd ar ran RNIB:
"Gall helpu plant i ddeall colli’r golwg ac amhariad ar y golwg o oedran cynnar feithrin ymwybyddiaeth, empathi a chynhwysiant. Trwy ein partneriaeth â Phartneriaeth Diogelwch Fferm Cymru, rydyn ni’n defnyddio straeon diddorol i gyflwyno'r pynciau hyn wrth atgyfnerthu negeseuon ymarferol am ddiogelu golwg a chadw'n ddiogel ar yr un pryd."