Mae Cyswllt Ffermio’n cynnig cyfres newydd o ddosbarthiadau meistr - MeistrBusnes, wedi’u teilwra ar gyfer y rhai yn y sector llaeth a chig coch.
Agwedd bwysig o ddosbarthiadau meistr Cyswllt Ffermio yw y gall aelodau rannu profiad a gwybodaeth gyda’i gilydd. Mae’r gweithdai’n cael eu cynnal ar ffurf “gweithdy” yn hytrach nag arddull ystafell ddosbarth annymunol a bydd y gweithdy’n mynd y tu hwnt i daenlenni traddodiadol gan gynnig golwg fanwl ac ymarferol ar economeg y fferm.
Bydd cyfle i’r aelodau glywed gan ffermwyr profiadol, arbenigwyr blaengar ac ymgynghorwyr. Bydd y ffenestr ymgeisio ar gyfer y MeistrBusnes yn agor 28 Gorffennaf ac yn cau 18 Awst, 2025.
Mae’r gweithdy MeistrBusnes llaeth ar gyfer ffermwyr llaeth sydd am ddeall mwy am gyllid eu fferm a sut i nodi meysydd i wella perfformiad economaidd.
Mae hwn yn weithdy uwch sy'n cynnig gwybodaeth dechnegol iawn i berchnogion fferm, rheolwyr a gweithwyr fferm ar draws pob system fferm laeth.
Mae’r gweithdy’n cynnwys ystod gynhwysfawr o destunau gan gynnwys cost cynhyrchu, dehongli cyfrifon y fferm, pennu cyllideb a dadansoddi proffidioldeb.
Bydd y rhai sy’n cymryd rhan hefyd yn dysgu am ffynonellau gwybodaeth economaidd, dangosyddion perfformiad allweddol, elw ar fuddsoddiad, a nodweddion ffermydd sy'n perfformio orau.
Bydd Owen Atkinson, milfeddyg Arbenigol RCVS mewn Iechyd a Chynhyrchu Gwartheg, ac Anna Bowen, ymgynghorydd busnes fferm sy’n gweithio i “The Andersons Centre”, ac sy’n arbenigo mewn mentrau llaeth yn arwain y gweithdy Meistrbusnes llaeth.
Mae’r gweithdy deuddydd hwn yn cynnig cyfuniad unigryw o fewnbwn milfeddygol a busnes fferm i helpu ffermwyr llaeth i ddeall yn well yr hyn sy’n sbarduno proffidioldeb a gwydnwch ar eu ffermydd. Fel siaradwyr, mae Owen yn dod â gwybodaeth fanwl am iechyd y fuches ac economeg clefydau ynghyd ag arddull wych a diddorol o gyfnewid gwybodaeth, tra bydd gen i brofiad o weithio gyda ffermwyr llaeth ledled y DU a’r fraint o weld data ariannol a gweithio gyda rhai o’r ffermwyr mwyaf blaengar yn y wlad. Fel ffermwr ymarferol, rwyf hefyd yn deall yr heriau wrth redeg busnes fferm a rhoi arferion gorau ar waith mewn sefyllfaoedd go iawn,
Meddai Anna Bowen.
Bydd y gweithdy MeistrBusnes llaeth yn cael ei gynnal ar 21-22 Hydref 2025. Bydd y lleoliad yn cael ei gadarnhau ar ôl i’r ffenestr ymgeisio gau, a byddwn yn ceisio cael lleoliad sydd mor ganolog â phosibl.
Mae MeistrBusnes cig coch wedi’i gynllunio i helpu ffermwyr reoli eu busnes yn fwy effeithlon, gan ddarparu offer i feincnodi dangosyddion perfformiad allweddol a gwneud penderfyniadau gwybodus i wella cynhyrchiant a phroffidioldeb.
Mae’r gweithdy hwn yn berffaith i ffermwyr da byw sydd am wella eu sgiliau rheoli busnes, gwella perfformiad ariannol a gwneud y mwyaf o weithrediadau’r fferm.
Bydd y gweithdy yn eich helpu i ddeall cyfrifon ariannol a chael cipolwg allweddol gan ddefnyddio meddalwedd cwmwl i ddadansoddi perfformiad ariannol cyfredol, gwella incwm wrth leihau costau, a datblygu cyllidebau a chynlluniau llif arian sy'n cael eu llywio gan elw.
Byddwch hefyd yn dysgu sut i greu system ffermio sy'n cyd-fynd â'ch nodau personol a busnes, gwella cyfathrebu fel tîm, nodi dangosyddion perfformiad allweddol, a rhoi strategaethau ar waith i gynyddu elw trwy well perfformiad anifeiliaid a rheolaeth well ar y borfa.
Bydd James Daniel a Rhys Williams o Precision Grazing Ltd yn arwain y gweithdai MeistrBusnes cig coch.
Bydd y cwrs MeistrBusnes yn eich helpu i ddadansoddi gwir berfformiad eich busnes a’ch helpu i ddatblygu’r sgiliau cynllunio, cadw cyfrifon, monitro a chyfathrebu sydd eu hangen i redeg busnes fferm wydn,
Meddai Rhys Williams.
Bydd dau weithdy MeistrBusnes cig coch yn cael eu cynnal ledled Cymru ar 17-18 Tachwedd a 19-20 Tachwedd 2025. Mae’r lleoliadau i’w cadarnhau, a bydd ond angen i chi fynychu un o’r gweithdai.
Am ragor o wybodaeth neu i wneud cais am ddosbarth meistr, MeistrBusnes Cyswllt Ffermio, cliciwch yma.