Khalid Aslan

Mae’r hyn a ddechreuodd yn fusnes bach yn y brifysgol wedi ehangu’n fenter manwerthu newydd feiddgar i’r entrepreneur o Aberystwyth, Khalid Ameen Aslam. Mae ei frwdfrydedd tuag at ffasiwn glasurol wedi esblygu’n fusnes llawn amser a hynny gyda chymorth Syniadau Mawr Cymru. 

Dechreuodd y gŵr 24 mlwydd oed werthu dillad ail law wrth astudio ei radd meistr, a sylweddolodd yn fuan iawn bod yr hyn a ddechreuodd fel hobi gyda’r potensial i ddod yn rhywbeth mwy, a hynny oherwydd y cymorth a gafodd gan Syniadau Mawr Cymru. 

Mae KB Retro, a agorodd ei ddrysau’n swyddogol ym mis Mawrth 2025, yn cynnig casgliad unigryw o hen ddillad cynaliadwy a ffasiynol, ac mae’r cwbl yn deillio o frwdfrydedd cynyddol Khalid tuag at hanes ffasiwn a’r economi gylchol.  

Wrth siarad am ddatblygiad ei fusnes, dywedodd: “Dim ond trio gwneud ychydig mwy o arian wrth i mi astudio oeddwn i, sy’n gallu bod yn ddrud iawn. Ond dros amser, gwirionais ar ddod o hyd i ddarnau, dysgu am gyfnodau ffasiwn, a hyrwyddo dewisiadau cynaliadwy. 

“Mae’r syniad sydd wrth wraidd y busnes yn syml, annog ffasiwn araf a dewisiadau cynaliadwy. Mae prynu dillad ail law yn helpu i leihau gwastraff ac yn lleihau effaith amgylcheddol y diwydiant ffasiwn, sef achos dw i’n teimlo’n gryf iawn drosto. Roeddwn i hefyd yn awyddus i weithio i fi fy hun.” 

Mae Khalid yn dweud bod llawer o’i lwyddiant yn deillio o’r arweiniad a gafodd gan Syniadau Mawr Cymru. Cysylltodd am gymorth ym mis Medi 2024 a chafodd ei baru â’r Cynghorydd Busnes Caryl George, a chwaraeodd ran allweddol mewn troi ei syniad yn fenter go iawn. 

Gyda chymorth Caryl, sicrhaodd Khalid y Grant Dechrau Busnes i Bobl Ifanc, a alluogodd ef i sicrhau gofod manwerthu yn Aberystwyth a rhoi bywyd i KB Retro. 

Bellach, mae’r siop yn ffynnu, yn cynnig popeth o hen grysau-t pêl-droed o’r 1980au i ddarnau cynllunydd moethus gan frandiau fel Carhartt, Stone Island, ac Arc’teryx. Gyda’r prisiau’n amrywio o £5 i £150, maent yn apelio i gyllidebau myfyrwyr a chasglwyr ffasiwn go iawn yn yr un modd. 

Dywedodd Khalid: “Dw i’n falch o gael cynnig rhywbeth unigryw i’r dref. Roedd yna fwlch gwirioneddol yn y farchnad yma, ac roeddwn i am ei lenwi gyda rhywbeth a oedd hefyd yn cyd-fynd â fy ngwerthoedd.” 

Gan edrych at y dyfodol, mae Khalid yn anelu at ehangu yn lleol ac ar-lein, ac yn gobeithio gweithio’n agosach â busnesau eraill yn Aberystwyth a gwella’r profiad siopa yno. Mae hefyd yn ymdrechu i feithrin presenoldeb ar-lein a fydd yn ei alluogi i dyfu y tu hwnt i Gymru a gwneud KB Retro yn enw hysbys ym mhob cwr o’r DU. 

Dywedodd Caryl George, Cynghorydd Busnes Syniadau Mawr Cymru: “Daeth Khalid ata i â chysyniad gwych ond doedd o ddim yn siŵr sut i’w wireddu. Manteisiodd ar bob cyfle i ddysgu, tyfu a mireinio’i fusnes, ac rwyf wedi fy mhlesio pa mor sydyn mae wedi troi ei fusnes bach yn fusnes llawn amser, go iawn, llwyddiannus. Rwy’n edrych ymlaen at weld beth sydd gan y bennod nesaf i'w chynnig iddo.”