Ffion McCormick Edwards

Ar ôl ennill sawl cytundeb statws uchel a gwobrau cynaliadwyedd, mae dylunydd ifanc graddedig o Abertawe yn creu argraff gyda’i chasgliad ffasiwn. 

Gyda chefnogaeth Syniadau Mawr Cymru, sefydlodd Ffion McCormick Edwards ei busnes Barefoot.Tech dair blynedd yn ôl yn ystod y cyfnod clo, a hynny mewn ymgais i fynd i’r afael â’r holl hen siwtiau gwlyb nad oedd yn cael eu defnyddio rhag cael eu gyrru i safleoedd tirlenwi.  

Daw Ffion o deulu sy’n sgïo dŵr erioed, sy’n golygu bod yna wastad ddewis o siwtiau gwlyb wrth law. Wrth i sawl siwt wlyb fynd yn rhy fach iddi hi ac aelodau o’r teulu, dechreuodd Ffion feddwl am ddatrysiad cynaliadwy i ailddefnyddio ac ailbwrpasu’r ffabrig. 

Ailddefnyddiodd siwtiau gwlyb a siacedi achub i greu ei chasgliad blwyddyn olaf yn cynnwys bagiau, bagiau cefn a phyrsau ym Mhrifysgol Celf Bournemouth, cyn dychwelyd i Gymru a throi ei hangerdd yn fenter ar ôl graddio. 

Mae menter arloesol Ffion, a ddechreuwyd yn ystod y cyfnod clo, wedi ennyn diddordeb cleientiaid gan gynnwys baddonau rhew a phodiau adfer moethus Lumi Therapy, a Chanolfan Siwtiau Gwlyb Caerdydd. Mae hefyd mewn trafodaethau gyda’r Ymddiriedolaeth Genedlaethol er mwyn stocio ei chasgliad o fagiau sydd wedi cael ail bwrpas. 

Ar ôl cyfarfod ar hap yn ei ffair gynnyrch gyntaf yn y Mwmbwls, comisiynwyd Ffion i greu bag y gellid ei addasu ar gyfer Sue Kent, cyflwynydd Gardeners’ World y BBC, ar gyfer ei hanabledd braich uchaf.  

Dywedodd Ffion: “Nid yw hwn yn llwybr a ystyriais o’r blaen, ond fe wnes i wir fwynhau addasu fy nyluniadau i greu cynnyrch mor werth chweil, ac rwy’n ystyried ei ychwanegu’n barhaol at fy nghasgliad.” 

Mae ategolion Barefoot.Tech wedi’u gwneud o 80% neu uwch o ddeunyddiau siwtiau gwlyb neoprene wedi’u hadfer, a chânt eu stocio gan Ecoast yn Saundersfoot yn ogystal â bod ar gael ar wefan Barefoot.Tech.  

Yr haf diwethaf, enillodd Ffion wobr Busnes Cynaliadwy y Flwyddyn yng Ngwobrau Pride Cymru Nation Radio, lle caiff unigolion tawel sydd wedi cyfrannu’n sylweddol at eu cymunedau eu hanrhydeddu. 

Dywedodd Ffion: “Roedd yn golygu popeth i gael fy nghydnabod am ein cyfraniad i gynaliadwyedd, ond hefyd i fod yn cynrychioli busnesau bach, lleol. Cefais fy synnu fy mod wedi ennill, gan mai rhan fach iawn o’r byd busnes yw fy musnes i. Roedd cael fy newis o blith cannoedd o rai eraill a enwebwyd yn golygu cymaint.” 

Ers hynny, mae Ffion wedi creu hetiau bwced unigryw i Glwb Rygbi Glyn-nedd, tîm Pêl-rwyd Castell-nedd, ac mae brand rygbi blaenllaw wedi cytuno i ffurfio partneriaeth â Barefoot.Tech, gan gyflenwi ffabrig o hen beli i Ffion roi ail-bwrpas iddynt fel ategolion.  

A hithau’n rhoi rhywbeth bach yn ôl fel Model Rôl Syniadau Mawr Cymru, mae Ffion hefyd yn cynnal sgyrsiau ysbrydoledig ynghylch cynaliadwyedd gydag egin entrepreneuriaid mewn ysgolion a cholegau, gan gynnwys Coleg Merthyr, Ysgol Gyfun Pontarddulais ac Academi Ieuenctid Casnewydd. 

Mae Ffion bellach yn canolbwyntio ar ddylunio casgliad gaeaf Barefoot.Tech o fagiau ffasiwn-gyfeillgar ac eco ystyriol, gan gynnwys casgliad ar gyfer Lumi Therapy, wedi’i ail-lunio o ddeunyddiau o’u hen faddonau rhew.  

Mae ei phartneriaeth â’r Ganolfan Siwtiau Gwlyb yng Nghaerdydd yn debyg i Lumi Therapy, ac mae Ffion hefyd yn ail-bwrpasu hen siwtiau gwlyb y Ganolfan. Dywedodd Ffion: “Rwyf wedi fy synnu pa mor llwyddiannus yw fy mrand. Dydw i ddim wedi gorfod chwilio’n arw am brosiectau ac rwyf wrth fy modd hefo’r gwaith.  

“I fi, roedd y cyfnod clo yn fendith. Cefais yr holl amser i ganolbwyntio ar ddatblygu fy nghasgliad fy hun. Mae’n braf gweithio i fi fy hun, gan fy mod yn gallu trio pethau gwahanol ac yn gallu dweud ‘na’ os oes gen i ormod o waith, sy’n sefyllfa wych i fod ynddi.”  

Llwyddodd Ffion i ddechrau arni, diolch i gymorth gan Syniadau Mawr Cymru, sy’n cael ei ariannu gan Lywodraeth Cymru i gefnogi entrepreneuriaeth yng Nghymru. Mae’r gwasanaeth ar gyfer unrhyw un dan 25 oed sydd eisiau datblygu syniad busnes, gan gynnwys myfyrwyr a graddedigion, fel rhan o’i ymrwymiad i’r Warant i Bobl Ifanc. 

Partner Ffion a soniodd wrthi gyntaf am Syniadau Mawr Cymru, ar ôl canfod y gwasanaeth ar-lein yng ngwanwyn 2022. Yna, mynychodd weithdy ar-lein wedi’i ariannu’n llawn gyda’r busnes o Gymru, Overseas Apparel. Sefydlwyd y busnes hwn hefyd gyda chymorth gan Syniadau Mawr Cymru, ac mae ganddynt siop yng nghanol Caerdydd.  

Dywedodd Ffion: “Roeddwn eisoes wedi graddio ac yn synnu bod y cynllun ar gael. Meddyliais yn syth ei fod yn gyfle gwych i ddechrau syniad busnes unrhyw un. Gwerthfawrogais yn fawr y cyngor ar nod masnach, treth yswiriant, cofrestru fel unig fasnachwr a chreu brand cymdeithasol. 

“Byddwn yn argymell i unrhyw berson ifanc yng Nghymru sydd â syniad busnes - mawr neu fach - i gysylltu â Syniadau Mawr Cymru. Fyddwn i ddim lle’r ydw i heddiw, yn gweithio’n llawn amser fel entrepreneur hunan gyflogedig, heb eu cefnogaeth.” 

Dywedodd dîm Syniadau Mawr Cymru: “Pan ddaeth Ffion atom, roedd ganddi eisoes syniad busnes llwyddiannus a oedd wedi ymddangos mewn digwyddiadau sy’n diffinio’r diwydiant fel Wythnos Ffasiwn Llundain, a gwyddai y gallai gael effaith ar y diwydiant ffasiwn cylchol yma yng Nghymru.  

Yr hyn nad oedd ganddi oedd rhywun i gynnig cefnogaeth iddi gyda’r elfennau hanfodol o redeg busnes. Dyna yw ein pwrpas penodol yn Syniadau Mawr Cymru, ac rydym yn edrych ymlaen at barhau i gefnogi Ffion wrth iddi ymgymryd â’r antur o entrepreneuriaeth.”