Ben Jenkins

Bu i achos fu bron â digwydd yn ystod ei blentyndod sbarduno uchelgais hirhoedlog Ben Jenkins i fod yn drydanwr medrus. Mae bellach wedi dechrau ei fusnes ei hun, Bull-Ectrics. 

Mae’r gŵr 24 oed o Ben-y-bont ar Ogwr yn cofio tân fu bron â digwydd yng nghartref ei blentyndod, lle gosododd adeiladwyr gawod newydd er gwaethaf bwrdd ffiwsiau diffygiol. Mae’r syniad o’r hyn a allai fod wedi digwydd wedi aros yn ei feddwl byth ers hynny. 

Dywedodd Ben: “Dechreuais i fod yn eithaf paranoid wrth dyfu i fyny am ddiogelwch systemau trydanol. Mae’r profiad wastad yng nghefn fy meddwl, ac rydw i wastad yn ymwybodol y dylid gosod a defnyddio unrhyw fath o strwythur neu ddyfais yn ddiogel a chywir.” 

Roedd Ben wastad eisiau gweithio iddo’i hun ac, ar ôl yr ysgol, bu’n gwneud ychydig o hyfforddiant personol, a dechreuodd ei fusnes garddio ei hun. Gyda diddordeb brwd mewn trwsio dyfeisiadau, o bethau fel PlayStation i deledau a cheir ei ffrindiau hyd yn oed, penderfynodd astudio Diploma NVQ EAL Lefel 3 am 2 flynedd mewn Gosod Systemau Electrodechnegol yng Ngholeg Castell-nedd Port Talbot.  

Ar ôl cwblhau prentisiaeth drydanol, aeth Ben ymlaen i ddechrau Bull-Ectrics gyda chymorth Syniadau Mawr Cymru, gwasanaeth wedi’i ariannu gan Lywodraeth Cymru sydd, fel rhan o Busnes Cymru, yn ceisio cefnogi unrhyw un dan 25 oed i ddatblygu syniad busnes, gan gynnwys myfyrwyr a graddedigion, fel rhan o’i hymrwymiad i’r Warant i Bobl Ifanc.  

Dywedodd: “Helpodd y tîm Syniadau Mawr Cymru fi i wneud cais am Grant Dechrau Busnes Pobl Ifanc, ac rwyf wedi buddsoddi’r arian i gael offer a gwisg. Rwyf wedi cael ychydig o swyddi ac wedi cwblhau dros 100 o gyrsiau Iechyd a Diogelwch yng Ngholeg Pen-y-bont ar Ogwr.” 

Roedd Ben yn un o bron i 40 o entrepreneuriaid ifanc a fynychodd benwythnos preswyl Bŵtcamp i Fusnes 2024 ym mis Mawrth wedi’i ariannu’n llawn gan Syniadau Mawr Cymru. 

Dywedodd Ben: “Mae Bŵtcamp i Fusnes yn ddigwyddiad arbennig sy’n rhoi cyfle gwych i atgyfnerthu’r sylfeini ar gyfer dechrau busnes. Bu siaradwyr yn arwain drwy feysydd allweddol busnes ac yn rhoi arweiniad ar lywio’r byd busnes. 

Rwyf hefyd wedi elwa ar nifer o weminarau Busnes Cymru, gan gynnwys rheoli eich cyllid a’ch treth, a oedd yn ddefnyddiol iawn. Ers hynny, rwyf wedi weirio tŷ haf, gweithio ar greu fy mhortffolio o brosiectau a fy mhroffiliau ar y cyfryngau cymdeithasol.” 

Dywedodd Amanda Bordessa, Cynghorydd Busnes Syniadau Mawr Cymru: “Mae Ben yn llawn angerdd at y maes gwaith hwn, a chanddo ysbryd entrepreneuraidd go iawn. Mae wedi uwchsgilio ac wedi creu sylfaen gleientiaid ffyddlon. Rydym yn dal i gynnig cymorth mewn sawl agwedd ar redeg busnes, ac rydym yn hyderus yr aiff o nerth i nerth.”